Bankuko aurrez aurreka zerbitzua erraztea eskatu dute pentsiodunek

Kudeaketak egiteko bide telematikoen abusua kritikatu dute

27.04.2021 | 00:19
Pentsiodunak atzo Donostiako banku baten aurrean. Argazkia: G. Estrada

donostia – Bankuen sektoreari aurrez aurreko arreta jasotzeko erraztasunak berreskuratzeko asmoz, Euskal Herriko Pentsiodunen Mugimenduak mobilizazioak egin zituen atzo EAEko hiru hiriburuetan eta beste herri batzuetan.

Gipuzkoan, mobilizazio nagusia Donostian egin zen Alderdi Ederreko Batzarrak deituta. Pentsiodunak Gipuzkoako hiriburuko erdiguneko banku-sukurtsaletan ibili ziren, aldarrikapen-gutun bat banatzen.

Bertan jasotzen dira beraien eskakizun nagusiak, hala nola sukurtsal bakoitzean 65 urtetik gorakoentzako leihatila esklusibo bat irekitzea, komisioak 2015eko mailara jaistea, edo "arreta-ordutegi nahikoa" duen aurrez aurreko zerbitzua berma-tzea, lehen bazeuden eta itxi diren udalerriak barne hartuz.

Euskal pentsiodunek finantza-erakunde guztiak murgilduta dauden eraldaketa digitalaren prozesua kritikatu dute; izan ere, pertsona nagusien kolektiboari kalte handia eragiten diola uste baitute, kasu guztietan ez dutelako bitarteko digitalik zerbitzuak eskuratu ahal izateko.

Banatutako idazkian jasotzen denez, estrategia horren azken helburua lanpostuak suntsitzea da, eta, horren ondorioz, sukurtsalak murriztea.

Horregatik salatu dute hilabeteko data jakin batzuetan ilara luzeak sortzen direla, eta adineko pertsona batzuek ezin dituztela gestioak aurrez aurre egin, euren udalerriko sukurtsala desagertu egin delako.

Euskal Herriko Pentsiodunen Mugimenduak deia luzatu die udalei, banketxeetara eta aurrezki-erakundeetara jo, eta "jardunbide egokiak berreskura ditzaten" eskatzeko, baita zerbitzu presentzial irisgarri bat eskaintzeko beharrezkoak diren baliabideak ipini ditzatela ere.

noticias de noticiasdegipuzkoa