Jon Miranderen argitaratu gabeko poema bat musikatu dute Ekizak eta Senperenak

Poema musikatu eta berau grabatu eta bideoklip batean erregistratzeko proiektua Euskal Herriko Unibertsitateak babestu du dirutan. Konkretuki Patxi Juaristik zuzentzen duen Gabriel Aresti Katedrak eta Amaia Elizaldek zuzentzen duen Mikel Laboa Katedrak bat egin dute Miranderen hitz hauek kantu egiteko, sortzaile polemikoaren jaiotzaren lehen mendeurrenaren aitzakian. “Miranderekin batera euskal poesia modernoaren aitaponteko izan zen Aresti eta euskal kantagintza berriaren pertsonaia nagusietakoa Laboa, beraz, ezin sinergia aproposagoa kanta berri hau plazaratzeko”, azaldu dute bi katedren arduradunek ohar baten bitartez.

Joserra Senperena ardura izan da kanta sortzea. Bere esanetan, hasiera hasieratik otu omen zitzaion abestia pianoarekin eta ahotsaz soilik janztea. Are gehiago, mikrofono lanetarako Willis Drummonden abeslariaren ahotsa etorri zitzaion burura, nahiz eta artean ez omen zuten pertsonalki elkar ezagutzen. Lan horretan poemaren “arima” musikara ekartzen saiatu dela aipatu du. Udazkeneko artsalde baten oroipena koplak “giro fantastiko batean” gertatzen den maitasun eszena bat kontatzen du, eta hortik “kanta pop bat atera zen piano pasarte misteriotsu batzuekin”.

Grabazioa Senperenaren etxean bertan egin zuten, aurtengo urtarrilaren 7an. Bost bider grabatu eta onena hautatu. Kantuaren erregistroari dagokionean, Pello Gorrotxategi arduratu zen soinuaz eta bideoaren ekoizpen lanak berriz, Zazpi T’Erdi ekoiztetxeak egin ditu.

Dokumentala edo abesti soltea?

Hasiera batean, Josu Martinezek zuzendutako dokumentalean jasotzeko enkargua izan zuen Senperenak, bera delako ez fikziozko lan horren soinu-bandaren konposatzailea. Azkenean, gerorako uztea erabaki zuten, eta aurrez aipatutako urteurrena baliatuz kaleratu dute abestia. Martinezek berak azaldu duenez, “metrajean zehar hainbat aurkikuntza berri agertu zirenez”, Miranderen hitz horiek lekurik gabe geratu ziren. Ordurako Senperenak kantu “eder” hori konposatua zuen, eta “azken momentura arte”, bukaerako kredituetan sartzea ere baloratu zuten. “Baina halako goxoki eder batek aurkezpen borobilagoa merezi zuelakoan, azkenean hori ere ez genuen egin”, eman du aditzera zinemagileak.

Elkarren arteko lehen kontaktua 2023ko Zinemaldian izan bazuten ere, iragan urteko urrian jaso zuen Jurgi Erkizak Senperanaren proposamena. Baiezkoa eman zion abeslariak konposatzaileari. “Olerkiaren nondik norakoak ulertzeko denbora behar izan banuen ere, kantaren melodiak eta giroak segituan harrapatu ninduten”, dio Willis Drummond taldearen buruak, esperientzia “liluragarria” izan omen den lanaren inguruan.