Loquillok '30 años de trangresiones' bira itxiko du larunbat honetan Kursaalen

Loquillok amaiera emango dio datorren larunbatean Kursaal Auditorioan, Kursaal Eszenaren denboraldiaren barruan, 30 años de Transgresiones birari. Bartzelonako artista polifazetikoa, 80ko hamarkadatik Gipuzkoako hiriburuan bizi dena, agertokietara itzuli da 1994an La vida por delante izeneko diskoarekin abiatu zuen poesia proiektuarekin.

Rock abeslari mitiko honen ustez, azken hamarkadetan poesiak "eraldaketa" ekarri dio eta "funtsezkoa" izan da bere pertsonaiarik rockeroena garatzeko, Kursaal Eszenatik adierazi dutenez.

"Poesia herri-musika bihurtzea"

30 años de Transgresiones "azken hamarkadetako gaztelaniazko poesiaren inguruko bere musika-ekoizpen onenaz beteriko show paregabea eta zuzeneko esklusiboa" da.

Laurogeita hamarreko hamarkadaren erdialdean, Loquillo, Gabriel Sopeñarekin batera, poeta garaikideen bertsoak agertokietara eramatera ausartu zen, "poesia herri-musika bihurtzeko". Harrezkero, hainbat disko grabatu ditu literatur ekoizpen horren inguruan.

Orain, disko horietan erregistratutako kantuen aukeraketa bat bildu du CD eta libreto bikoitz batean, 30 años de Transgresiones, Antología Poética izenburupean. Lan berri honek azken hamarkadetako gaztelaniazko poesiaren esparruko autore nabarmenen olerkien egokitzapenak biltzen ditu, hala nola Bernardo Atxaga, Julio Martínez Mesanza, Mario Benedetti, Jacques Brel, Luis Eduardo Aute, Luis Alberto de Cuenca edo Jaime Gil de Biedma, besteak beste.

Loquillok berak "erreferentziazkotzat" jotzen ditu idazle horiek bere lanean, La vida por delante (1994), urrezko diskoa izan zena, Con elegancia (1998), Mujeres en pie de guerra (2004), Su nombre era el de las todas las mujeres (2011) eta Loquillo en Madrid (2012) albumak argitaratu ondoren.

Proiektu diskografiko honek Loquillo eszenatokietara ekarri du berriro, bere ohiko bandarekin batera, bere alderdi poetikoa eskaintzeko, baina "bere zuzenekoen indarra eta pasioa galdu gabe". Ikuskizun bat aurkeztuko du bere jarraitzaileengandik "hurbilen eta interpretatzaileena" den alderdia erakutsiz.