Gipuzkoako Foru Aldundiak lurraldeko eskualde guztietara zabalduko ditu legegintzaldi honetan dagoeneko udalerri batzuetan sortu diren eta adinekoen zein zaintzaileen ongizatean "onura nabarmena" ekarri duten zaintza-ekosistemak.
Deba
Foru ekimen honetan parte hartu duen udalerrietako bat Deba da. Bertan, Foru Gobernuaren Kontseiluak bilera ibiltari bat egin du astearte honetan, eta hartutako erabakien berri emango du asteazken honetan, prentsaurrekoan.
Eider Mendoza buru duen taldea Debako alkate Alazne Txurrukarekin bildu da, eta Aldundiak eta Udalak elkarrekin bultzatzen dituzten proiektuak aztertu dituzte.
Prozesua
Besteak beste, Deban egiten ari diren prozesuaz hitz egin dute, Foru Aldundiaren babesarekin, "zainketen ekosistema berritzaile" bat sortzeko, "adinekoen beharrei modu integralean erantzungo diena". Prozesu horretan parte hartzen ari da "herriko hainbat eragilek osatutako diziplina anitzeko talde eragile bat, egoeraren azterketa egin duena".
Diputatu nagusiak Deban egiten ari diren lana txalotu du, "komunitate osoaren parte-hartzea ardatz hartuta", Aldundiak ohar baten bidez jakinarazi duenez.
"Lurralde osoko hainbat herritan tokiko ekosistemak sustatzen ari gara, eta metatutako esperientziak erakusten digu oso eragin positiboa dutela adinekoen zaintzan, haien bizi-kalitatean eta ongizate integralean, eta jauzi handia egiten dutela arlo horretan. Horregatik, eskertzekoa da Deba ere ahalegin horretan murgiltzea, Gipuzkoako gainerako udalerrientzat ere eredu izango baita ", azpimarratu du.
"Lehentasunezko proiektu estrategikoa"
Alkateak adierazi du Udalarentzat "lehentasunezko proiektu estrategikoa" dela.
"Ekimen honen bidez, adinekoen zaintza gizarte osoaren onerako erantzukizun partekatua dela erakutsi nahi dugu; izan ere, kalitatezko zaintza bermatzeak eragin zuzena eta positiboa du adinekoengan, baita haien senide eta zaintzaileengan ere", adierazi du.
