Azpeitiko lau ikastetxetako ikasleak berriz murgildu dira kultur sormenaren munduan Dinamoa sormen gunean, Txinaurriak proiektuaren baitan.
Beste urte batez, Kulturaz Kultur Kooperatibak sustatzen duen egitasmo honek ikasturte osoan zehar esperientzia artistiko eta sortzaileak eskaintzen dizkie haur eta gazteei, hezkuntza formalean kultura baliabide eraldatzaile gisa txertatuz.
HHtik DBHra
Proiektuak Dinamoa sormen guneko lau adierazpen artistiko nagusietan oinarritzen du bere ibilbidea: hitza, irudia, soinua eta gorputza.
Haur Hezkuntzatik hasi eta Derrigorrezko Bigarren Hezkuntzara arteko ikasleek, ziklo bakoitzean, diziplina bateko saio bat jasotzen dute.
Helburua argia da: ikasleek artearen bidezko bizipenak izan ditzaten, sormena landu eta kulturarekiko harreman zuzena gara dezaten.
Soinuaren espazioa
Ikasturte honetako lehen urratsak soinuaren espazioan egin dituzte ikasleek.
Espazio horrek eskaintzen dituen aukera ludiko eta pedagogikoak baliatuta, soinuaren hainbat alderdi landu dituzte: entzun, grabatu, editatu eta nahastu.
Taldekako dinamikak
Taldekako dinamiken bidez, soinuaren mundua barrutik ezagutzeko aukera izan dute.
Kulturaz Kultur Kooperatibako soinu teknikarien laguntzarekin, zuzeneko ekitaldi batean egiten diren prestaketa lanak bertatik bertara ezagutu dituzte: instrumentuen probak, muntaiak, eta teknikari lanak barne.
Esperimentatzeko aukera
Gainera, ikasleek soinu mahaiarekin esperimentatzeko aukera izan zuten, euren entzumen fina eta arretaren gaitasuna praktikan jarriz.
Beste talde batek, berriz, bideo podcast baten grabaketa prozesuan parte hartu zuen.
Edukien ekoizpena
Aukeratutako gai baten harira, taldeko kide bakoitzak funtzio bat hartu zuen bere gain: mikroaren aurreko tertuliakide, teknikaria, kameraria edo errealizatzailea.
Dinamika horri esker, ikus-entzunezko edukien ekoizpena nola antolatzen den ezagutu zuten, eta sormen kolektiboa lantzeko esperientzia aberasgarria izan zuten.
Hezkuntza ez-formala
Txinaurriak ez da Kulturaz Kultur Kooperatibak garatzen duen ekimen bakarra.
Hezkuntza ez-formalean ere ari da lanean, herriko hainbat kolektibo eta eragilerekin elkarlanean.
Eragileak
Gaztelekuko gaztetxoekin, Emakume Txokoko kideekin edota Txolarteko lagunekin egiten diren saioek erakutsi dute kultur esperientzia partekatuak loturak sortzeko eta gizarte kohesioa sendotzeko tresna eraginkorrak direla.
Hausnarketa eta parte-hartzea
Dinamika hauek ez dira soilik aisialdiko jarduera gisa planteatzen, baizik eta hausnarketa, parte-hartzea eta adierazpena bultzatzen dituzten prozesuak dira.
Kulturazek bultzatutako kultur sentsibilizazio eta mediazio lanak norabide bikoitza du: batetik, hezkuntza formalean errotutako Txinaurriak egitasmoa, haur eta gaztetxoen sormen gaitasuna pizteko; eta bestetik, herriko kolektiboekin elkarlanean, kultur bizitza sustatzeko eta herritarren egunerokotasunean kultura errotzeko helburuarekin.
Konpromisoa
Azken batean, proiektu hauek guztiak Kulturazek duen konpromisoaren erakusgarri dira: kultura herritarren bizitzako ardatz bihurtzea, adin guztietako pertsonentzako esperientzia esanguratsu eta kolektiboen bidez.
