Gipuzkoako Foru Aldundiko Kultura Departamentuak Raul Guerra Garrido Bekaren deialdi berri bat abiarazi du, 2023an martxa jarri zena. Donostian bizi zen idazle eta farmazialariaren figurari omenaldia egiteko jarri zen abian ekimena eta sorkuntza artistikoa sustatzea du helburu.
Goizane Álvarez Kultura diputatuak nabarmendu duenez, Raul Guerra Garridoren "oroimena eta ondarea bizirik mantentzeko modu bat" da beka hau. Izan ere, "ezinbesteko egilea da, eta haren bizitza eta obra gizartearekiko konpromiso sakon batek markatu zituen". Idazle "aparta" izateaz gain, 1976an Nadal saria eta 2006an Letren Sari Nazionala jaso zituena, "bakearekin eta askatasunarekin konprometitutako gizona izan zen, eta beka honekin, bere memoria gorde nahi dugu", azaldu du Alvarezek.
Ildo horretan, laguntza horrek "Gipuzkoan sorkuntza artistiko eta literarioan dihardutenei interpelatzen die, balio demokratikoekiko eta gizarte-aurrerapenarekiko konpromisoan sakontzeko lanak egin ditzaten".
Erantzukizuna gizarte gisa
"Kultura ez da neutrala, eta erakundeetatik gizarte askeagoa, justuagoa eta pluralagoa eraikitzen lagunduko duen sorkuntza bultzatzeko erantzukizuna dugu. Beka hau iraganaren errekonozimendua da, eta, aldi berean, komunitate demokratiko gisa batzen gaituzten balioak defendatzen jarraitzeko tresna", adierazi du.
Diputatuak ziurtatu duenez, "leku ezberdinetan adierazpen askatasuna, pentsamendu kritikoa edo egiarekiko konpromisoa bezalako oinarrizko balioak zalantzan jartzen diren une honetan", beka hau Sailak "kultura aske, konprometitu eta eraldatzaile baten alde egindako apustu irmoa" da.
"Gorrotoa, polarizazioa edo atzerakada demokratikoa sustatzen duten diskurtsoen aurrean, Raul Guerra Garridoren figura errebindikatzen dugu erresistentzia etikoaren eta ausardia intelektualaren ikur gisa", defendatu du Goizane Alvarezek.
Deialdiaren oinarriak
25.000 euroko dirulaguntza da, eta ibilbide sendoa duten edozein diziplina artistikotako sortzaileei zuzenduta dago. Helburua jatorrizko proiektuen garapena bultzatzea da, "gizartearen errealitatearekiko konpromiso sakona islatzen dutenak, Guerra Garridoren arrastoari jarraituz, begirada kritiko, humanista eta konprometitua ezaugarri izan zuena".
Izena emateko epea ekainaren 16ra arte dago zabalik, eta eskaerak Gipuzkoako Foru Aldundiaren dirulaguntzen atarian ezarritako formularioa betez edo kbulegoa@gipuzkoa.eus helbidean edo 943 11 33 43 telefonoan kontsultatuz aurkez daitezke.
Bekak jatorrizko proiektu bat sortzeko eta gauzatzeko gastuak estaliko ditu, gehienez ere urtebeteko epean, eta euskaraz edo gaztelaniaz aurkeztu ahal izango da. Zenbatekoa bi fasetan ordainduko da: %50 deialdia ebatzi ondoren eta gainerakoa proiektua amaitu ondoren. Proiektuaren memoria dirulaguntza eman eta hurrengo urteko urriaren 30a baino lehen aurkeztu beharko da.
Deialdia edozein diziplina artistikotan esperientzia eta prestakuntza egiaztatua duten pertsonei irekita dago. "Proiektuaren ibilbidea eta kalitatea, originaltasuna eta balio demokratikoekiko eta aurrerapen sozialarekiko konpromisoa" baloratuko dira.
Nor zen Raul Garcia Garrido?
Raúl Guerra Garrido "jaiotzez eta bihotzez madrildarra zen, familiagatik eta haurtzaroagatik bertziarra; eta donostiarra, maitasunagatik eta hirian bizi izandako elkarbizitzagatik". Hiru leku horiek markatu zuten idazle honen obra eta bizitza.
Farmazian doktorea, Idazleen Elkarteko lehendakaria eta 'Kantil' aldizkariaren sortzailea izan zen. Guerra Garridok Nadal Saria jaso zuen 1976an 'Lectura insólita de El Capital' eleberriagatik, bahituta dagoen eta Marxen lana irakurtzen duen euskal industrialari baten erretratua egiten duen eleberriagatik. Urte batzuk geroago, Planeta Sariko finalista izan zen El año del Wolfram lanarekin, El Bierzon girotuta.
Bere ibilbidea Letren Sari Nazionalarekin amaitu zen, eleberri beltzaren, errealismo sozialaren, hausnarketa politikoaren eta gipuzkoar gizartearen bizi-testigantzaren artean dagoen obra baten aitorpen gisa.
