Europako Txapelketaren etenaldiaren ondoren, ostiralean 20:00etan hasita kiroldegian Zuazo bizkaitarraren aurka jokatuko duen derbiarekin itzuliko da Super Amara Bera Bera lehiaketara. Bi lehiakideen artean sailkapenean alde handia egon arren, Imanol Alvarez ez da partida horretaz batere fio. “Selekzioarekin aritu direnei jarraipena egiten saiatu gara, eta hemen geratu diren jokalari gutxirekin entrenatzea egokitu zaigu, kalitatean hobetzeko ahaleginean, bakoitzaren banakako teknika, edota denboraldian zehar hainbeste partida ditugunean prestatzeko astirik izaten ez dugun egoera oso bereziak aztertzen. Normalean, geldialdi hauek ondo aprobetxatzen ditugu, eta aurreko urteetan nahikoa indartuta atera izan gara etenaldietatik. Ez aurten ere hala izaten den”, esan zuen talde donostiarreko entrenatzaileak.
Horren harira honakoa aipatu zuen ermuarrak “ondo ezagutzen duzun jokalarien aurka jokatuko dugu, hemengo jokalari asko aurrez aurre, eta oso ezagun duzun entrenatzailearen aurka. Nolanahi ere, derbi bat jokatzea beti da polita. Zaila ere bai, ordea, azkenean dena berdintzen baita, ezta? Soilik sailkapenari begiratuko bagenio, akats galanta egingo genuke. Normalean ez dugu horrelakorik egin eta berdin jarraitu nahi dugu, nahiz eta duela urte batzuk Zuazo berdintzeko gauza izan”.
Super Amara Bera Beraren alde, Imanol Alvarezek jokalari guztiak prest izango ditu ligako konpromiso horretarako. Horixe gauzarik positiboena zeresana baduen aurkariari aurre egiteko: “Egia esan ez dute asko espekulatzen, euren joko-moldean aritzen saiatuko dira, ondotxe ezagutzen dituzte euren indarguneak eta zer aprobetxatu behar duten, nahiz eta badakiten batzuetan horrek akats asko egitera eramaten dituela. Baina, tira, horixe da euren jokatzeko modua, etekina hortik atera dezakete eta ondo iruditzen zait. Jaito teknikariaren dinamikan oso sartuta dagoen taldea da Zuazo. Aldaketa dezente egin arren, nik uste dut aspaldian antzera jokatzen dutela, abiadura handiarekin, lan handia eginez”, azaldu du Alvarezek ostiraleko aurkariaren bertuteei buruz.
BI HITZORDU URTEA AMAITZEKO
Derbiaren ostean, Super Amara Bera Berak larunbatean, hilaren 28an, amaituko du urtea Kanaria Handian. Horren ondoren, hamar eguneko geldialdia izango du berriz talde gipuzkoarrak, eta 2025. urtea Guerreras Ligako beste partida batekin hasiko du, urtarrilaren 8an Granollersen aurka. Hain zuzen ere horixe izango du atariko partida Bera Berak, larunbatean, hilaren 11ean, Gascan, Racing 92 talde frantziarraren aurka European Cupeko multzoen fasean estreinaldikoa jokatu aurretik.
Egutegia, beraz, partidaz beteta dauka Super Amarak, eta horri Europako lehiaketakoak gehitu behar, denboraldi honetan Super Amara ligaxkarako sailkatu baita. “Partida horietarako, batez ere Europakoetarako, ez dugu motibazio handirik beharko, mundu guztia dagoeneko oso entxufatuta dagoelako”, aitortu zuen Imanol Álvarezek, denboraldi honetako lehiaketa kontinentalaren sistema ere aztertu zuelarik: “Badakigu puntu horiek garrantzitsuak direla, nahiz eta orain bizpahiru urtekoaren aldean oso bestelakoa den, orduan dena liga erregular batean amaitzen baitzen. Orain play-offak jarri dituzte, eta, agian, ez dira horren garrantzitsuak, beste aukera bat izango dugulako; baina ahalik eta goren amaitu behar da, eta lehenengoa izan badaiteke, hobe. Bestela, bigarren, eta bestela, hirugarren, baina hor goian egotea komeni da, eta horretarako puntuak behar ditugu”.
