50 urtetako udaberririk lehorrena Gipuzkoan

Euskalmeten arabera, urteko sasoi honetarako espero ziren prezipitazioen erdiak baino ez ditugu jaso Euskadin

10.06.2021 | 00:51

donostia – Euskalmetek bildutako datuen arabera, martxoa, apirila eta maiatza barne hartzen dituen udaberri meteorologikoa, "oso lehorra" eta "zeharo lehorra" artean kokatuko litzateke; mende honetako eta azken 50 urteetako lehorrena izan baita Gipuzkoan. Euskadiko batez besteko tenperatura, oro har, balio normaletan ibili da, soilik 0,1 gradu gorago, kostaldean izan ezik, non epel portatu den ekialdeko muturrean eta hotz mendebaldeko muturrean.

Euskalmetek atzo azaldu zuenez, udaberrian zehar Euskadiko eremurik handienean, prezipitazioak 200 l/m2-tik gertu edo azpitik egon dira; baita 100 l/m2-tik behera ere Arabako hegoaldeko hainbat gunetan. Datuak biltzen dituen Gipuzkoako Eskaseko estazioan soilik gainditu dira metro koadroko 300 litro.

Ia lurralde osoan, urteko sasoi honetan espero zen euriaren erdia baino gutxiago egin du; horregatik, azken 50 urteetako edo gehiagoko udaberririk lehorrena izango litzateke, Gipuzkoan bereziki, eta Goierrin izan ezik.

Euskal Meteorologia Agentziak adierazi duenez, euri asko egin duen egun apurren artean, martxoaren 19a eta apirilaren 11 dira nabarmentzeko moduko bakarrak; baita bi egun horien arteko 20 eguneko "sekuentzia lehor luzea" ere.

Bestalde, maiatzean prezipitazio "konbektibo" trinkoak ere gertatu ziren, ekaitz eta guzti, hainbat datu-biltze estazioetan markak apurtuz. Eta tenperaturari dagokionean ere hainbat errekor gainditu dira aurtengo udaberri lehor honetan. Batetik, martxoaren 30eko eta 31ko maximoak (Oleta 30,5°C; Mungia 29°C) eta, bestetik, apirilaren 16ko tenperatura minimoak (Berastegi -2,9°C; Orozko -1°C).

anteriorsiguiente
noticias de noticiasdegipuzkoa