Coronavirus | Estatu Batuetan Johnson & Johnsonen txertoa onartu dute

Lau milioi dosiko lehen bidalketa gaur jasotzekoak dira eta hilak amaierara arte 20 milioi dosi izango dira

01.03.2021 | 00:34
Coronavirus | Estatu Batuetan Johnson & Johnsonen txertoa onartu dute

donostia – Ameriketako Estatu Batuetako Elikagaien eta Sendagaien Administrazioak (FDA) atzo onartu zuen Johnson & Johnsonen covid-19aren aurkako dosi bakarreko txertoa larrialdietarako erabiltzea.

Joan den ostiralean botika hori baimentzea gomendatu ostean, Johnson & Johnsonena izango da Estatu Batuetan onartutako hirugarren txertoa, Pfizer eta Modernarekin batera.

"Txerto hau baimentzeak eskuragarritasuna handitzen du, COVID-19rako prebentzio medikurako metodorik onena delarik, eta Estatu Batuetan milioi erdi bizitzatik gora hil dituen pandemiaren aurkako borrokan lagungarri izango zaigu ", adierazi zuen Janet Woodcock FDAko ordezkariak, ohar batean.

Albistearen berri izan bezain laster, Joe Biden Ameriketako Estatu Batuetako presidenteak "krisiari amaiera emateko gure ahaleginetan aurrerapauso pozgarri hau ospa-tzekoa" dela esan du, eta datozen asteetan horrelako albiste pozgarri gehiago jasotzea espero duela.

Hala ere, Bidenek argi utzi nahi izan zuen, "litekeena da gauzak berriro okertzea, koronabirusaren aldaera berriak hedatu ahala", eta hori baliatu zuen joan den hilean iragarri zuen "erreskate planaren beharra" azpimarratzeko.

Ameriketako Estatu Batuek (AEB) lau milioi dosiko lehen sorta gaur bertan jasotzea espero dute, eta martxoaren amaierara arte, guztira, 20 milioi, NBC Newsek azaldu duenez.

Dosi hauek, gainerako txertoak bezain hotzak ez diren tenperaturetan gorde daitezke, eta munduko saiakuntza kliniko batek frogatu duenez, Johnson & Johnsonen txertoak %66ko eraginkortasuna omen du koronabirusaren aldaeren prebentzioan, eta %85eko eraginkortasuna kasu larrien babesean.