Azpeitia | Azpeitiak Organo zikloaren bi kontzertu hartuko ditu abuztuan

Abuztuaren 3an eta 19an izango dira Loiolako basilikan eta gonbidapenak hilaren 28ra bitartean eskura daitezke

22.07.2021 | 00:37
Giampaolo Di Rosa organujoleak abuztuaren 3an joko du. Argazkia: N.G.

Azpeitia – Loiolako basilikak Donostiako Udalak, Gipuzkoako Foru Aldundiak eta Eusko Jaurlaritzak udan Donostiako Musika Hamabostaldiaren baitan urtero antolatzen duten Organo zikloaren bi kontzertu hartuko ditu abuztuaren 3an eta 19an eta bertaratzeko interesa duten herritarrek hilaren 28ra bitartean eskura ditzakete gonbidapenak Azpeitiko Udalaren Kultura sailean (943 157 068 telefono zenbakia).

Udaletik jakinarazi dutenez, "covid-19a dela eta ikus-entzule mugatua izango dute kontzertuek, eta horregatik, beharrezkoa izango da gonbidapenak aurrez hartzea". Pertsona bakoitzak, gehienez ere, lau sarrera hartzeko aukera izango du.

Edonola ere, aurtengo Organo zikloaren baitan Loiolako basilikan abuztuaren 3an ikusi ahalko den aurreneko kontzertua Giampaolo di Rosa organujoleak eskainiko du (20.00etan).

Abuztuaren 19an, berriz, Ander Telleria (akordeoi mesotonikoa), Anna Margules (flauta), Vanesa García (sopranoa), Elena Ruiz (mezzosopranoa), César Polo (tenorra) eta Jorge Apodaca (baxua) musikariek osatzen duten Tetraphilla Ensemble taldearen Ad Maiorem Dei Gloriam izeneko ikuskizunarekin gozatu ahalko da (19.30ean).

Tetraphilla Ensemble taldeak Anchieta, Desprez, Cabezón edo Janequin bezalako konpositoreen obrak joko dituzte Loiolako basilikaren emanaldian, beti ere, Loiolako Iñigoren bizitza musikaren bidez erakusteko.

noticias de noticiasdegipuzkoa