Azkorteko ermitak 50 urte bete ditu aurten

Azkorteko ermitaren 50.urteurrena ospatuko da aurten. Izan ere, 1973ko maiatzaren 3an inauguratu zuten, harrobi bat ustiatu ondoren eraitsitako antzinako ermita homonimoaren ordez. Barruan XIII. mendeko Kristo bat gurtzen da, Azkorteko Santa Cruz ermita zaharretik datorrena, bai eta Milagrosaren irudi bat ere.

Horiek horrela, hilaren 3ko erromeriaz gain, bihar ere hainbat ekitaldi antolatu dira ermitaren inguruan.

Honela, 10.00etan taberna zabalduko dute eta salda, txorizoa, odolkia eta edaria hartzeko aukera egongo da. 11.00etan meza eskainiko da eta 12.00etatik aurrera herri kirolak eta trikitilariek girotutako erromeria egongo da.

Igandean, gainera, Ttakun KEk eta Lasarte-Oriako Udalak erromeria antolatu dute ere.

Autobus zerbitzua izango dute herritarrek ermitara igotzeko, 10.00etatik aurrera, Biyak Bat adinekoen egoitzatik.