Bi danborrada berri eta 5.000 danborjole izango dira Erdialdean

donostia - Erdialdea danborrada gehien dituen auzoetako bat da eta, hala ere, bi konpainia berrik haien tartea topatu dute ordutegian San Sebastian egunean desfilatzeko. Emakumeen Etxeko (emakumeek bakarrik osatuta) eta Deustuko Unibertsitateko danborradek Erdialdean eta Amara Zaharrean jada ateratzen diren beste 24 konpainiekin bat egingo dute aurten. Programa ofizialetik kanpo, Eiztari Etxeak ere astinduko ditu danborrak eta hurrengo urterako auzoko 27. danborrada izango da.

Urtarrilaren 20ean hainbat momentutan egingo dute topo danborrada batzuek eta besteek eta Koldo Mitxelena aurreko eszenatokian batera ere joko dute danborrada batzuek egunean zehar. Bertan bandera igoerarik ez dute egingo (gauerdian ateratzen diren lau taldeek haien egoitzetan abiatzen dute ibilbidea) baina Corcones, Mundaiz, Espai Catalunya eta Kai Aldek bat egingo dute gauean zehar. Goizean, berriz, Kutxako langileak eta Deustukoak elkartuko dira lehenengo aldiz eta arratsaldean Gaztedi, Summa eta Eskola igoko dira taulara. Gauerdian banderaren jaitsiera Catedral-Centenarioren eskutik egingo dute Erdialdean.

Beste auzo batzuetan bezala, hemen ere danborradek haien omenaldi propioa antolatu dute eta Vasconiako danbor nagusi José María Pérezen lana goraipatuko dute Arroka plazan danborrada horren bukaeran (13.45ean). La Espigak, bestalde, 25 urte betetzen ditu eta desfilatzen hasi baino lehen omenaldi xume bat jasoko du, 1.30ean izen bereko tabernaren aurrean.

Erdialdean aterako diren 26 danborraden artean 18 mistoak dira, bat emakumeek osatutzen dute bakarrik (Emakumeen Etxearena) eta beste zazpi gizonek bakarrik osatzen dituzte (Ondar Gain, Corcones, Cantábrico, Antonio Bar, Amigos del Europa, Gizartea eta Catedral Centenario). Zerrenda osatzen dute Espai Catalunya, Kai Alde, Donostiako Amara Areto futbol kirol elkartea, Mundaiz, La Espiga, Vasconia, Kutxako langileak, Jatorra, Deustuko Unibertsitatea, Eskaut Gia, Txubillo, Gaztedi, Peña Anastasio, Peña Anastasio Juvenil, Summa Aldapeta (Marianistas), Eskola, Lagun Artea eta Atlético San Sebastián konpainiek. Horien artean hiriko danborrada jendetsuena dago, Peña Anastasiorena, bi konpainiek osatzen baitute (bat gizonezkoena eta bestea emakumezkoena) eta guztira 450 lagun inguru biltzen ditu. Manolo Múgica Memoriala ere banatzen du talde honek eta aurten Pepe Dioni hostalariari emango dio.

Aurtengo berrikuntza nagusia 2016ren eskutik dator eta Erdialdeko danborradek ere Europako Ereserkia joko dutela iragarri dute. Hala ere, danborrekin jotzeko egindako konponketekin guztiz ados ez daudela garbi utzi dute konpainia batzuek.

Azken hilabeteotan 2016ko arduradunekin izandako tira-biren ondoren, Erdialdeko danborradek parte hartuko dute urtarrilaren 23an inaugurazio ekitaldian egingo den ekitaldian. Auzo honetatik 2.000 lagun inguru joango dira Kontxako hondartzan egingo den bilera erraldoira. “Donostiaren eta donostiarron festa handia gure patroiaren eguna dela frogatu nahi dugu eta Danborrada haren isla dela”, nabarmendu dute auzo honetako danborraden ordezkariek.