Ruper Ordorikaren doako kontzertua Hendaiako Abadia Jauregian

Larunbat honetan izango da Abadia Sariaren 25. edizioa dela eta antolatutako programazio bereziaren ekitaldi nagusietako bat: Ruper Ordorikaren kontzertua Hendaiako Abadia jauregian. Aldundiak 1996tik bultzatutako sariak euskararen normalizazioan nabarmen lagundu duten pertsonen edo kolektiboen ibilbidea aitortzen du eta iaz Oñatiko artistari egin zitzaion aitortza.

Kontzertua herritar guztientzat irekia da, baina aldez aurretik gipuzkoa.eus/abadiasaria webgunean eskatu beharko dira gonbidapenak.

Gipuzkoako Aldundiko bozeramaileak, Irune Berasaluze, azaldu duenez erakundeak “denekin partekatu nahi du" ekitaldia Hendaiako jauregia bezalako "gune enblematiko batean ”. “Herritar guztiak animatzen ditut aukera hori ez galtzera, esperientzia paregabea, hunkigarria eta esanguratsua izango baita ”, adierazi du.

Aurten Gure Zirkuari

Bersaluzek gogorarazi duenez, aurtengo Abadia saria emateko ekitaldi nagusia ekainaren 19an izango da, Eibarren, eta Gure Zirkua kolektiboa aitortuko dute, euskarari egindako ekarpenagatik. Aurtengo efemeridearekin bat etorriz, Aldundiak Abadia Sariaren balio instituzionala indartzea erabaki du, hura eguneratzeko oinarriak ezarriz eta haren oihartzun publikoa zabalduz.