Euskal populazioa 11.382 pertsonatan hazi da atzerritarrei esker

2024ko urtarrilaren 1ean, 11.382 pertsona gehiago bizi ziren Euskadin, aurreko urtean baino % 0,5 gehiago. Atzerritarren kopuruak gora egin zuen, 14.371 gehiago, eta nazionalitate espainiarreko 2.989 pertsona gutxiago zeuden.

Estatistikako Institutu Nazionalak ostegun honetan argitaratutako Biztanleen Urteko Erroldaren arabera, aurtengo urtarrilaren 1ean 2.227.684 pertsona bizi ziren Euskadin; urtebete lehenago, berriz, 2.216.302 ziren.

Horietatik, 2.013.099k Espainiako herritartasuna zuten. Hala ere, 2023ko urtarrilaren 1ean kopuru hori handiagoa zen, 2.016.088 hain zuzen ere.

Atzerritarrak, berriz, 214.585 ziren urte hasieran, eta 200.214 ziren 2023ko hasieran.

Atzerritarren gorakadarekin batera, estatistikak baieztatzen du urte horretan gehiago hazi direla gizonezkoak emakumezkoak baino.

Gizonak 1.083.488 ziren urte hau hasi zenean, eta 2023ko urtarrilean 1.055.504 ziren; beraz, gizonezkoen populazioa % 0,55 hazi da, zehazki, 5.984 gizon gehiago.

Emakumezkoen populazioa ere hazi egin da, baina zertxobait gutxiago, % 0,47, 1.138.798tik 1.144.196ra, hau da, 5.398 emakume gehiago.

Lurraldeka

Lurraldeka, Bizkaian 1.159.368 pertsona bizi dira, Gipuzkoan 729.722 eta Araban 338.594. Azken probintzia horretan hazi da gehien biztanleria proportzioan, % 0,6 (2.286 pertsona).

Bizkaian % 0,5 igo da (+6.086 herritar) eta Gipuzkoan % 0,4 (+3.010).

Estatuan %1,1 igo da

Estatuan Euskadin baino gehiago hazi da biztanleria. 2024ko urtarrilaren 1ean 48.619.695 biztanle zeuden, 2023ko data berean baino 534.334 pertsona gehiago (% 1,1 gehiago).

Erroldan jasotako 48,6 milioi biztanleetatik, 42,1 milioi espainiarrak ziren (% 86,6) eta 6,5 milioi atzerritarrak (% 13,4) – aurreko urtean baino % 6,8 gehiago-.

2023an atzerritarren hazkunderik handienak Kolonbian (124.566 gehiago), Perun (47.598) eta Venezuelan (47.095) izan ziren. Atzerritar ugarienak marokoarrak (920.693), errumaniarrak (620.463) eta kolonbiarrak (587.477) izan ziren.

2023an, biztanleria hazi egin zen autonomia-erkidego guztietan, batez ere Madrilen (137.365 pertsona gehiago), Katalunian (110.268) eta Valentziako Erkidegoan (103.090).