Aldundiak eta Donostiako Aquariumak bat egin dute Ulysses proiektuarekin, itsasoetako kutsadura plastikoari aurre egiteko

Horrela, Foru Aldundiak eta Donostiako Aquariumak Ulysses Proiektua garatzen lagunduko dute beren esperientziaren bidez. Proiektu hori 2020an sortu zen, eta estuario, ibai, itsaso eta ozeanoetako plastikoek eragindako kutsaduraren aurka borrokatzen du, Bizkaiko Golkoko ekosisteman interes berezia jarriz eta nazio- eta nazioarte-mailan garapen-proiekzioa izanik.

Espelek adierazi duenez, Donostiako Aquariumak "irtenbide jasangarriak sustatzen dituzten eta gure itsasoak babestearen garrantziaz gizartea kontzientziatzen duten ekimen guztietan parte hartzeko erantzukizuna" sentitzen du. Gainera, "hezkuntza aldaketarako tresna indartsua" dela azpimarratu du, eta "etorkizuneko belaunaldiei itsas ingurumenaren zaintzaile izateko inspirazioa emateko konpromisoa" hartu du.

Konpromisoa

Asensiok adierazi duenez, Gipuzkoa Ulysses Data For Sciense Proiektuarekin bat egiteak lurralde historikoak "ozeanoak babesteko eta itsasoko kutsaduraren aurka borrokatzeko duen konpromisoa" indartzen du. "Foru Aldunditik urteak daramatzagu hondartzen kudeaketa integralean, sakabanatutako zaborraren bilketan eta Blue Point bezalako proiektuen sustapenean lanean, itsas hondakinek Euskal Kostaldean duten eragina ahalik eta txikiena izan dadin", adierazi du.

Bestalde, Rogelio Pozo Azti elikagaien eta itsasoaren ikerketa-zentroko zuzendari nagusia ziur agertu da itsas zaborrarentzako irtenbidea "zientzian" datzala, eta, horregatik, ezinbestekoa dela "ikerketaren alde egiten jarraitzea eta lortutako ebidentzia erabiltzea gure ekintzak gidatzeko ingurumena babesteko eta ozeanoak mehatxatzen dituen kutsadura plastikoaren aurkako borrokan".

Izaera kolaboratiboa

Azkenik, Jorge Ballester Data For Science Fundazioko zuzendariak azaldu duenez, "Ulysses Proiektuaren ezaugarri nagusietako bat lankidetza izaera da; izan ere, mota guztietako erakunde publiko eta pribatuek parte hartzen dute proiektuan, unibertsitateek, ikastetxeek eta industriek; azken finean, gizarte osoak".

Ulysses Data For Science proiektua 2020ko ekainean hasi zen forma hartzen, ozeanoetara plastikoak iristeak eta haiek eragiten zituzten ondorio kaltegarriek gero eta arazo gehiago sortzen zituztelako. Proiektu hori epe ertain eta luzerako konponbideak bilatzen dituen ikuspegi zientifiko batekin planteatu zen hasieratik, eta, hala, AZTI eta Elecnor Deimos enpresa aeroespaziala hura garatzen hasi ziren.

Sortu eta urtebetera, 2021. urtearen erdialdean, Ulysses Data For Science Eusko Jaurlaritzako Natura Ondarearen eta Klima Aldaketaren Zuzendaritzari aurkeztu zitzaion, eta dibulgazio-ekintzak diseinatu ziren. Joan den martxoan hasi zen Ulysses Data For Science hedatzen, plastikoen etorrerari eta banaketari buruzko ezagutzan sakontzeko, egoera kezkagarri hori arintzeko estrategien katalizatzaile izan dadin.