Euskararen aldeko jaiak milaka lagun bildu ditu 2024ko Herri Urratsaren 41. edizioan, eta denetariko programazioaz gozatzeko aukera izan dute, haurtxoentzako makina bat jarduera tarteko. Euskal komunitateak indarrak batu ditu gaurkoan Senpereko lakuaren inguruan. Maiatzaren bigarren igandean Ipar Euskal Herriko gune hori bihurtu ohi da, euskaldun izatea harrotasunez aldarrikatzeko erakustoki.
Jai ludikoa eta aldi berean aldarrikatzailea izan da, euskararen aurkako eraso ugari pairatu diren urte korapilatsu honen ondoren. Sugarrak bizirik jarrai dezan, oraingo honetan, Lapurdiko Beskoitze herrian ikastetxe berri bat eraikitzeko erabiliko dira jaian bildutako funtsak. Ortzadarra izan da aurtengo edizioko leloa. Eta gaur ikusteko aukerarik izan ez bada ere, milaka euskaltzalek bizkarra eman diote eguraldi txarrari, eta 10.00etatik aurrera kolorez bete dituzte euskal probintzien izenak daramatzate zazpi guneak.
Lapurdiko Beskoitze herrian ikastetxe berri bat eraikitzeko erabiliko dira jaian bildutako funtsak
Gipuzkoa Gunea izeneko agertoki berri bat, eta ohi baino bi gune gehiago -Bizkaia eta Kei- izan diren berrikuntza nagusiak, musika eskaintza zabala izan du programazioan. Delirium Tremens eta Esne Beltza taldeek jo dute, besteak beste, Nafarroa Berria gunean, eta Gipuzkoakoan Niko Etxart, Bele, Neomak eta Nøgen aritu dira.
Pilota partiduekin eta hainbat jolasekin gozatzeko aukera ere izan da, baita Amets Arzallus, Irantzu Idoate, Haira Aizpurua eta Unai Agirre bertsolarien jardunaz ere. Dantza maite dutenek Xiberua inguruan topatu duten euren espazioa, hainbat dantza talde aritu baitira bertan.
Iparraldean euskararen normalizazioak bizi duen egoera konplexua
Ospatzeko egun alaia izan da; ezin ahaztu, ordea, Iparraldean euskararen normalizazioak bizi duen egoera konplexua, Seaskako ikastolen elkarteko lehendakari Peio Jorajuria-k gogora ekarri duenez. “Urte latz batzuen ondoren gauzak baretzen hasi direla dirudi, eta espero dezagun proiektu berria esparru normalizatu baten barruan garatzea”, eman die aditzera komunikabideei, jaiaren edizio berriari hasiera eman aurretik.
"Ikastola berria ez dugu guk eraikiko, Euskal Herri osoak eraikiko du Beskoitzeko ikastola"
Seaskak bildutako dirua elkartearen alokairuak eta maileguak ordaintzeko erabiliko da, eta aurten, bereziki, Beskoitzeko ikastola berria eraikitzeko, urte askoan eraikin aurrefabrikatuak erabili behar izan dituztelako. “Tankera honetako ekimen bat aurrera eramateko laguntza eta elkartasuna ezinbestekoak ditugu. Ikastola berria ez dugu guk eraikiko, Euskal Herri osoak eraikiko du Beskoitzeko ikastola”, nabarmendu du Seaskako lehendakariak. Atzera begiratu besterik ez da egin behar Herri Urrats jaiak duen garrantziaz jabetzeko. Federazioak jakinarazi duenez, urte hauetan zehar, 33 ikastola, bost ikastetxe eta lizeo bat eraiki ahal izan dira lortutako irabaziei esker.
