Hondarribiko San Silvestreak 15. edizioa ospatuko du aurten: “Lasterketa berezia dugu"
Abenduaren 31n San Silvestre lasterketaren 15. edizioa egingo da Sport MundikHondarribiko udalaren laguntzarekin antolatuta, . “Lasterketa berezia dugu, alde batetik jai giroan ospatzen delako eta, bestetik, urtero egiten den bezala, lortutako diru ekarpena elkarte bati emango zaiolako”, esan zuen Lupe Queiruga Kirol zinegotziak.
Aurten, onuradunak AFAGI, Gipuzkoako Senitartekoen, Lagunen eta Alzheimerra edo beste dementziaren bat duten pertsonen elkarteko kideak izango dira. “Familientzako euskarri bat da, aholkularitza, formakuntza, arreta eta abar ematen baitie, hau da, babesa”, gaineratu zuen zinegotziak. Gainera, Queirugak nabarmendu nahi izan zuen elkarte honek eta beste askok egiten duten lana, “askotan sistemak betetzen ez dituen beharrei heltzen baitiete”. Bukatzeko, herritarrak lasterketan parte hartzera gonbidatu zituen zinegotziak, "urtea jai giroan bukatzeko".
Aldi berean, Juanan Garcia Sport Mundiko kideak azaldu zuen aurten elkarteak 25 urte betetzen dituela. Denbora honetan, 50 GKErekin lan egin dute eta milioi bat euro baino gehiago eman dituzte mundu osoko proiektuak garatzen laguntzeko. Horrez gain, urteurrena datorren otsailaren 8an Hondarribiko Itsas Etxean ospatuko dutela iragarri zuen.
Bestalde, San Silvestre lasterketaren ibilbidea betikoa izango dela esan zuen, 6 kilometrokoa, Portuan hasi eta bukatzen dena. “Dagoeneko 1.500 lagunek eman dute izena, horietako % 40a emakumeak dira. Izen-ematea Kirolprobak webgunean egin daiteke eta 2.000 lagunetara iristerakoan itxiko da”.
Azkenik, Garciak eskerrak eman zizkion lasterketaren babesleei, bolondresei eta parte-hartzaileei.
Bildutako dirua AFAGIrentzat izango da
Bere aldetik, Iñaki Olalde AFAGI elkartearen presidenteak lasterketa solidarioaren antolatzaileei eskerrak eman zizkien, “Alzheimerra eta beste dementziak dituzten pertsona zein beraien senideei bizi kalitatea hobetzen laguntzeagatik”. Izan ere, hori da AFAGIren helburua. “Gaixotasun hauek dituzten pertsonei bisibilitatea eta elkartasuna erakusteko lasterketa izatea gustatuko litzaiguke”, gaineratu zuen Olaldek, dementziak “nahiko estigmatuta dauden gaixotasunak” dira eta.
Gainera, Olaldek azaldu zuen 2024an Gipuzkoan gaixotasun kognitiboren bat duten 14.000 pertsona inguru daudela kalkulatzen da, diagnostikatuta edo diagnostikatu gabe, ez baitago erroldarik. “Halakorik ez duten probintzia bakanetakoak gara. Eusko Jaurlaritzak bat egin dezan saiatzen ari gara”, esan zuen. Kopuru hori gero eta handiagoa da, eta, bilakaeraren arabera, 2050erako 40.000 pertsonara iristea espero da. “Horregatik uste dugu kontzientzia hartzeko garaia dela eta bai gizarteak eta bai era guztietako erakunde publikoek elkarlanean eta elkarlanean jardun behar dugula jada gaixotasuna pairatzen duten pertsonen bizi-kalitatea hobetzeko. Gainera, aurreikuspenei begira, gizartea prebentzio tresna nahikoekin hornitu nahiko genuke”, bukatu zuen AFAGIko presidenteak.
Bukatzeko, Olaldek edozein gaixotasun kognitibo duen norbait hurbil duten pertsona guztiak AFAGIra joatera animatu nahi izan zituen, Irun, Arrasate, Donostia, Eibar, Oñati, Ordizia, Tolosa edo Zarauzko edozein ordezkaritzatan, 943 297 118 telefonora deituz edo afagi@afagi.eus helbidera email bat bidalitz. "Gaixotasuna oso gogorra da bakardadean, zaintzailearentzat eta familia osoarentzat", gaineratu zuen.