Urtero bezala datorren uztailean udaleku irekiak antolatu ditu Lizartzako Udalak herriko haurrentzako. Antolatzaileek azaldu dutenez, 2013 eta 2021 urteen artean jaiotako haurrek parte hartu ahal izango dute udaleku hauetan.
Berrikuntza
Udalekuak uztailaren 1etik 30era egingo dira, goizeko 10.00etan hasi eta 13.00etara bitartean. Aurten gainera, berrikuntza modura, goizeko zaintza eskainiko du Udalak, 9.00etatik aurrera.
Prezioa
Parte hartu nahi dutenentzako izena ematea irekita dago. Lizartzan erroldatutako haurrentzako prezioa 70 euro izango da, zaintza eskatuz gero 80 euro, eta erroldatu gabekoek 85 euro, zaintzara geratuz gero 95 euro. Bi seme-alabak parte hartuz gero, bigarrenak %20ko deskontua jasoko du. Gainera, egoera zaurgarrian dauden familientzako laguntza bereziak aurreikusi direla azaldu dute udaleko kideek.
Udalak, gainera, udalekuetan parte hartzera gonbidatu nahi izan ditu herriko familiak, egitasmoaren helburua baita “gazteen artean talde giroa sortzea”.
Horretaz gain, iraileko herriko festetako egitaraua antolatzen hasteko, lehen bilera egin duela azaldu du Udalak. Herritarren proposamenak jasoko dituzte guztien gustuko jai egitaraua osatzeko helburuarekin.
