Lezok goi ur-hornikuntza sistema hobetzeko hitzarmena sinatuko du

- Añarberekin goi ur-hornikuntzako toki sistemak besterentzeko lankidetza hitzarmena onartzea izango da Lezoko Udalak asteazkenean ezohiko osoko bilkura burutuko duen puntu bakarra. Hitzarmen hau hornidura-sare integrala hobetzeko lanean jarraitzeko lehen urratsa da.

Azkeneko 40 urteetan, Añarbek Lezoko goi ur-hornikuntzako %70 kudeatzen du. Hitzarmenaren helburua zerbitzuaren kalitatea eta kantitatea hobetzea da, horretarako, Añarbek bere gain hartuko luke altako horniduraren %100aren kudeaketa. Giza baliabideak eta baliabide teknikoak egunean 24 orduz ziurtatzea izango litzateke beste abantaila bat, urteko 365 egunetan.

Hitzarmenaren barruan, Lezoko industrialdeetan eta udalerriko landa-eremuan ur-hornidura bermatuko duen biltegi berri bat egitea aurreikusten da eta Lezo-Monatxo sistemako bilketak ere hobetuko dira. Izan ere, Monatxo sisteman dauden azpiegituretan beharrezkoa den birgaitzea egingo da.

Añarbek 2,65 milioi euro inguru inbertitzea aurreikusten du azpiegitura berri horiek gauzatu eta daudenak hobetzeko.

Era berean, Añarbeko Uraren Mankomunitateak behe sarean 587.000 euroko inbertsioa egiteko akordioa lortu da, zuntz-zementuzko hodiak kentzeko.

Lezoko Udalak inbertsio guztien %1,9 baino ez du ordainduko.