Eibarrek kolpe latza jaso zuen Santanderrera egindako bisitan (4-0) eta jaitsiera postuetan murgildu da. Talde armaginak ondo hasi zuen partida, baina lehen zatiko azken txanpan aurreneko gola jaso ondoren, burua erabat makurtu eta gol andana jaso zuen azkenean, taldearen eta Beñat San Jose entrenatzailearen egoera kinka larrian jarriz. 

FITXA

Racing 4

Eibar 0

RACING DE SANTANDER Ezkieta; Mantilla, Javi Castro, Pablo Ramon (Facu, 66. min), Salinas; Andres Martin (Sangalli, 59. min), Íñigo, Gustavo Puerta (Yeray, 81. min), Peio Canales, Iñigo Vicente (Arana, 81. min); Villalibre (Jeremy, 59. min).

EIBAR Magunagoitia; Cubero, Arambarri (Nolaskoain, 46. min), Marco Moreno, Arbilla, Corpas (Adu Ares, 71. min); Javi Martínez (Magunazelaia, 58. min), Sergio Alvarez, Aleix Garrido, Guruzeta (Mada, 71. min); Marton (Bautista, 58. min).

Golak 1-0, 36. min: Iñigo Vicente. 2-0, 43. min: Villalibre. 3-0, 49. min: Javi Castro. 4-0, 78. min: Marco Sangalli.

Epailea Alvaro Moreno (Madrilgo batzordekoa). Txartel horiak atera zizkien Eibarko Arambarriri (10. min), Sergio Alvarezi (61. min) eta Corpasi (64. min).

Estadioa Campos de Sport de El Sardinero. 19.139 ikusle.

Hasiera parekatuta

Talde gipuzkoarra ausardiaz zelairatu zen Sardineroko berdegunera, aurkaria presionatu eta partidaren ekimena eramaten ahaleginduz, kantabriarrek erasoko gizonak abantailarekin aurki ez zitzaten.

Norgehiagoka oso parekatuta hasi zen eta ez zen antzeman sailkapenean bi taldeen artean dagoen aldea; egia esan, Eibar erosoago aritu zen partidaren lehen minutu horietan, zelaian ondo kokatuta eta Racingen baloi irteerako akatsak baliatzen, Ezkietak babestutako aterantz kontraerasoan saiatuz.

Baina Santanderreko taldeak ez du askorik behar gola egiteko, eta, jokaldi bikaina eginda Peio Canalesek Magunagoitiaren aurrean bakar bakarrik zegoela errematea langaren gainetik bota bazuen ere, handik hiru minutura, Iñigo Vicentek arearen atarian baloia jaso eta zutoinaren ondoan ipini zuen jaurtiketa, kantabriarrak markagailuan aurreratuz.

Jasotako golaren zartakoa gainditu nahian zebilen Eibar, baina atsedenaldirako gutxi falta zela, korner batean, berriro ere Iñigo Vicentek lehen zutoinean jarri zuen baloia, eta Villalibrek buruz bigarren zutoinera bidali zuen baloia, Magunagoitiak harrapatu ezin izan zuen parabola zital batekin. Bigarren mailako pitxitxiak ez zuen hutsik egin bere harrapakin gustukoenaren aurrean, eibartarren aurka jokatu dituen hamar partidetan zazpigarren gola lortuta.

Bigarren zatia

Aldageletatik itzuli ondoren, bigarren zatia hasi eta hiru minutura, partida oso aldeko jarri zitzaien kantabriarri, beste behin Iñigo Vicentek ateratako korner batean, Javi Castrok 3-0ekoa sartu baitzuen erremate bortitz batekin, bigarren zati ia osoa falta arren neurketa kasik erabakita utzirik.  

Garaipena eskuan zutela Racingek gehiegi estutu ez bazuen ere, abantaila handitzen jarraitzeko aukerarik izan zuten, eta Iñigo Vicenteren beste asistentzia bat aprobetxatuz, Marco Sangalli Realeko jokalari ohiak ederki asmatu zuen Magunagoitiaren irteera gainditzen, behin betiko 4-0ekoa sartu eta kantabriarren garaipen erosoa ziurtatzeko.

Gauzak horrela, Eibarrek lehenbailehen erreakzionatu beharko du (datorren igandean Cultural y Deportiva Leonesa hartuko du Ipuruan, arratsaldeko 18:30etan) egoera kezkagarrian dagoen taldera lasaitasun pixkabat ekartzeko.