Euskal enpresen %26 berritzaileak dira

Euskal enpresen % 26,2 berritzaileak ziren 2023an, beren produktuan edo negozio-prozesuan, 2022an baino 2,4 puntu gehiago eta duela bost urte baino ia 9 puntu gehiago.

Eustat Euskal Estatistika Institutuak jakitera eman duenez, enpresa horiek berrikuntzan egindako gastua 3.565 milioi eurokoa izan zen iaz, aurreko ekitaldian baino % 8,7 handiagoa.

2023an, 10 langile edo gehiagoko enpresa berritzaileen ehunekoa % 38,4ra igo zen, aurreko urtean baino 3 puntu gehiago, eta duela bost urte baino 8,3 puntu gehiago, 2018an, orain erabilitako metodologia berriarekin seriearen lehenengo urtean.

Bi berrikuntza-motak aztertuz gero, produktuaren berrikuntza % 23k egin zuten, eta negozio-prozesuen berrikuntza % 32,9k.

Enpresa horien % 33,4k finantzaketa publikoren bat jaso zuten. Laguntzen jatorriari dagokionez, Eusko Jaurlaritzak emandakoak nabarmentzen dira, enpresa berritzaile guztien % 21,8ra iritsi baitziren; foru-aldundiek eta toki-administrazioek enpresa horien % 10,4 eta % 3,4 finantzatu zuten, hurrenez hurren, eta Estatuko Administrazioak % 14,1era.

Gainera, enpresen % 10,2k Europar Batasunaren finantzaketa jasotzen dute: % 2,7k 'Horizonte Europa' programaren bidez eta % 8k EBren beste finantzaketa baten bidez.

Produktu berritzaileek negozio-zifraren % 32,2 sortu zuten, batez beste, autonomia-erkidegoan produktu-berrikuntza duten enpresetan; aldatu gabeko produktuek edo pixka bat aldatutakoek, berriz, gainerako % 67,8a eragin zuten enpresa horietan.

Zailtasunak

Enpresen % 60,3k uste du badirela berrikuntza zailtzen duten faktoreak; besteak beste, enpresaren barruan beste lehentasun batzuk daudela (% 47,5), kostu handiegiak (% 38,8) eta enpresaren barruan finantzaketa-falta (% 29,9).

Azkenik, Eustaten estatistikaren arabera, enpresen % 27,4k ingurumen-onurak dituzten berrikuntzak egiten dituzte, bai enpresaren barruan (% 19,5), bai kanpora begira (% 23,8).

Lehenengoetan, barnekoetan, hauek nabarmentzen dira: birziklatzen dira, beren erabilerarako edo salmentarako, % 9,9; material batzuen ordez, gutxiago kutsatzen duten edo hain arriskutsuak ez diren beste batzuk erabiltzen dira, % 7,8; energiaren edo CO2 aztarnaren erabilera murrizten da, % 7,4; ekoitzitako unitate bakoitzeko material edo uraren erabilera murrizten da, % 6,3; eta lurzoruaren, akustikaren, uraren edo airearen kutsadura murrizten da, % 6,1.

Bigarren multzoan, enpresatik kanpo ondorioak dituztenak daude: erabilitako produktuen birziklapena erraztea (% 20,2) eta produktuen bizitza erabilgarria luzatzea (% 10,5), produktu iraunkorragoen bidez.