Tabakaleran bigarren eskuko 200 mozorro baino gehiago egongo dira

Tabakalerak Mozorrotruk azoka hartuko du otsailaren 20, 21 eta 22an eta martxoaren 27, 28 eta 1ean, bigarren eskuko 200 mozorro baino gehiagorekin.

Ohar batean, Tabakalerak, Imact Hub Donostiak eta Emausek, ekimenaren antolatzaileek, azaldu dute ekimenaren helburua dela "Inauteri dibertigarria, inklusiboa eta ahalik eta ingurumen-inpaktu txikiena duena sustatzea".

Mozorrotruken mozorro osoak, jantzi solteak, osagarriak eta erretalak erosi ahal izango dira, mozorro original eta iraunkorrak egiteko.

Dohaintzak egin edo beste mozorro batzuengatik trukeak egin nahi dituzten pertsona guztientzako mozorroak jasotzeko gunea ere izango da azoka. Horretarako, edukiontzi bat jarriko da salmenta postuen eta tailerren ondoan.

Gainera, beren mozorroan konponketaren bat egin behar dutenentzat, edo berria bihurtu nahi dutenentzat, bi tailer egingo dira, irekiak eta doakoak, josteko tailer ireki bat eta upcycling tailer ireki bat. Joskintzako profesional batek lagunduko die biei, eta josteko makinak, erremintak eta materialak izango dituzte.

Saldu gabeko mozorroak

Mozorrotruk amaitu ondoren, saldu gabe geratu diren mozorroak Emaus Gizarte Fundazioaren dendetara eramango dira, eta han salgai egongo dira.

Gainera, ekonomia zirkularreko praktika horien bidez, gizarte-bazterkeriako egoeran edo arriskuan dauden pertsonak lan-merkatuan sartzea sustatzen da, Emaus Gizarte Fundazioaren laneratze-enpresen bidez.

Ordutegiak

Mozorrotruk otsailaren 20, 21, 22, 27 eta 28an eta martxoaren 1ean irekiko da. Osteguneko eta ostiraleko ordutegia bost eta erdietatik zazpi eta erdietara izango da, eta larunbatekoa hamaiketatik ordu batera. Konponketa eta upcycling tailerrak otsailaren 22an izango dira, hamaiketatik ordu batera, eta otsailaren 27an, bost eta erdietatik zazpi eta erdietara.