Omenaldi erraldoia

donostia - 1982. urtean konpartsa sortu zenetik, laguntzen aritu dira Maribel eta Eva ahizpa, zendua. Horregatik, Itzurun taldeko erraldoi eta buruhandiek omenaldia egin zioten atzo haien jantziez urtero-urtero arduratu den Maribeli.

Ibilbidean abiatu baino lehen, Zuloaga plazan bildu ziren erraldoi eta buruhandiak Maribelekin eta lore sorta bat eman zioten.

Urte hauetan guztietan konpartsaren jantziak garbitu, lisatu eta josi ondoren, egunero-egunero erabiltzeko prest utzi ditu. Egunean-egunean, San Telmoko atean egoten da Maribel, “bere erraldoi eta buruhandiak” noiz helduko, behar bezala txukundu eta biharamunerako prest uzteko: “Ezin ordainduzkoa da Donostiako Erraldoi eta Buruhandien Udal Konpartsaren tresnatzaile moduan egiten duen lana”.

“Lan eskergagatik nahiz konpartsarenganako maitasun eta atxikimenduagatik” eskaini zioten atzoko omenaldia Donostia Festakek eta Itzurun Erraldoi eta Buruhandien Konpartsak. Festa Jardueretako zinegotzi ordezkari Alfonso Gurpeguik kontuak atera zituen: “Urte hauetan 2.176 jantzi apaindu dituzte Maribelek eta Evak”. - N.G.