Gaztetxea kolore berrituekin

ARROPA zaharra jantzi, brotxak eskuetan hartu eta margotzeari ekin zioten larunbatean Groseko Kortxoenea gaztetxean. Eraikinaren kanpoaldea itxuraz aldatzeko auzolan eguna deitu zuten gazteek, eta giro ezin hobean aritu ziren lanean bertaratutakoak.

Eraikin nagusia koloretako eta tamaina desberdineko hirukiz bete zuten eta, ondoan, aparkalekuaren aldeko horman, bestelako mural eta graffitiak egiteko aukera ere izan zuten.

Oraindik lana amaitzeko "zer-tzelada batzuk" falta zaizkiela onartu dute gaztetxeko kideek, baina larunbateko auzolan egunaren ondoren lan gehiena egin dutela. "Eta emaitza txukunarekin, bai horixe", gaineratu dute, harro.

Kortxoeneako kideen esanetan, haien helburua muralak gaztetxearen izaeraren isla izatea zen. "Eta lortu dugula uste dugu, estilo aniztasunarekin, kolore bizi ugarirekin, margo alaiekin...", azaldu dute Groseko gazteek.