Etxadiko langileentzat "irtenbide duina" eskatu du LABek

Donostia. LABek Etxadiko kiroldegiko langileei "irtenbide duina" emateko eskatu dio Real Club de Tenis elkarteari. Tenisak instalazioen kudeaketa utzi du arrazoi ekonomikoengatik eta Etxadin lan egiten zuten sei langileak langabezian geratuko dira. Hori ekiditeko, grebari ekin zioten duela bi aste, Udalari (Donostia Kirolak hartuko du bere gain kudeaketa) haien postuetan mantentzeko exijitzeko.

"Egun udal administrazioetan dagoen pribatizazio mailarekin bukatzeko urratsak ematea ezinbestekoa ikusten dugu. Zentzu horretan begi onez ikusten dugu Udalak Etxadiko instalazioen kudeaketa era zuzen batean bideratzeko egindako hautua", dio LABek. Bestalde, dena den, orain arte Teniseko langileak izan diren sei lagunentzat "lan irtenbide duin bat beharrezkoa da", sindikatuaren ustez.