Donostia – Emakumezkoen Eurocup txapelketan bere multzoko liderra den IDK Gipuzkoak, lehen postu hori apur bat gehiago sendotu lezake ostegun honetan Grezian, 19:30etan hasiko den partidan puntu bakarrera duen Proteas Voulas taldeari irabaziz gero.
Azu Muguruzaren taldeak ez du partidarik galdu multzoen fase honetan. Taldeak oso joko sendoa erakutsi du, eta bi garaipen lortu ditu dagoeneko, Izar Gorriaren aurka, Gasca kiroldegian, eta Sepsi SIC talde errumaniarraren aurka, joan den ostegunean bisitari zelarik. Beraz, lehiaketan hasi aurretik faboritotzat zutenen iritzia berresten ari da oraingoz.
Jakina, talde gipuzkoarrak gehiago nahi du; izan ere, lehen bi jardunaldietan porrotak jasoaz hasi zuen Espainiako ligan garaipen garrantzitsua lortu baitzuen Estudiantesen aurka aurreko igandean Gascan, eta horri esker animoz gainezka egingo diote aurre kontinente mailako partidari.
Atika eskualdeko Makis Lioukas pabiloian jokatuko den partidarako faborito argia izango litzateke euskal taldea, Izar Gorriak azken jardunaldian greziarrei 40 puntuko aldearekin irabazi ostean (93-53). Inolaz ere, Azu Muguruzak ez die jokalariei gehiegizko konfiantzarik onartuko, ustekabeak saihesteko.
Iris Mbulito joko-antolatzaile kanariarraren parte hartzea zalantzan izango du IDK-k; C multzoko lehen jardunaldian min hartu zuen Izar Gorriko serbiarren aurka, eta harrez gero ez du jokatu. Nolanahi ere, Louice Halvarsson pibot suediarraren une gozoak dotore orekatu beharko luke baja hori, bera izan baitzen Estudiantesen aurka saskiratzailerik onena 15 punturekin, ligako azken jardunaldian.
