Frantzian aurkitutako ETAren zazpi zuloetako batean 2009ko abuztuan topatutako lapa motako lehergailu bat, bateragarria da Diego Salva eta Carlos Saenz de Tejada guardia zibilak urte horretan bertan hil ziren Mallorcako Palmanovako atentatuan erabilitakoarekin; huraxe izan zen Espainian heriotzak eragin zituen talde terroristaren azken atentatua.
Zulo horietan aurkitutako efektuei buruzko dokumentazio guztia zekarten bi euskarri informatiko (DVD) aztertu ondoren egin zuen Guardia Zibilak aurkikuntza hori. Frantziako agintariek joan den martxoan bidali zuten informazio hori, oraindik ere argitzeke dagoen atentatua ikertzen ari den Auzitegi Nazionaleko Instrukzioko 4 zenbakiko Epaitegi Zentralak eskatuta.
Epaitegiari luzatutako txostenean, “Guardia Zibilaren ibilgailuetan jarritako gailuen berezitasuna” azpimarratu dute ikertzaileek, ondorioztatuz bat datorrela, “zalantzarik gabe”, zuloetako batean aurkitutakoarekin.
Bateragarritasun hori ez da soilik fabrikazioari dagokionean, oso lotura estua omen dute baita ere “erakunde terroristaren alderdi logistiko eta operatiboekin, gailu horiek mota horretako atentatuetarako propio sortutakoak direla ematen duelako”.
Guardia Zibilak azpimarratu duenez, zazpi zulo horiek ETAren aparatu militarraren egitura logistikoak kudeatzen zituen: Aitzol Etxaburu Artetxek, Alberto Machain Berazak eta Andoni Sarasola Yarzabak “aipatutako egituraren arduradun nagusiak zirelarik”.
Frantziak bidalitako dokumentazioa, Epaitegiak eskatutako sei Europar ikerketa-aginduren (OEI) emai-tza izan da, eta Cabrerolles, Camplong, Ferrals les Montagnes, Generalite, Minerve eta Vieussango zuloetan aurkitutako materialarekin lotuta daude. Aurkitutako materialaren artean, amonala, kloratita eta “lapa-ETA” tankerako hainbat gailu fabrikatzeko erabilitako hornigai-aitzindarien kilo ugari zeuden.
