Saudi Arabiak eta Errusiak petrolio-hornidura jaitsi dute

Behin Saudi Arabia eta Errusia buru dituen LPEE+ek eskaintza jaitsiko zuela iragarri ondoren, azaroan entregatzeko Brent petrolio upelaren prezioa %4,14 igo zen Londresko etorkizunekoen merkatuan. Europan erreferentziazkoa den Ipar Itsasoko petrolioak, 96,88 dolarretan kotizatzen zuen Londresko International Exchange Futures-en 13.30ak baino minutu batzuk lehenago.

Hileroko telekonferentzian LPEE+eko ministroek berretsitako erabaki horrek baliorik gabe utzi zuen, aurreko bileran, abuztuaren 3an, irailerako onartutako ponpaketaren igoera.

“2022ko abuztuko ekoizpen-mailara itzultzea” erabaki zuten ministroek, gogora ekarriz “eguneko 0,1 milioi upeleko (mbd) goranzko doikuntza soilik irailerako aurreikusita zegoela”, Lurralde Petrolio Esportatzaileen Erakundeak (LPEE) ohar batean jakinarazi zuenez. Horrez gain, azken adierazpenean, “beharrezkoa balitz, eta merkatuaren bilakaera aztertzeko, OPEP+aren beste ministro-bilera bat edozein unetan deitzeko aukera kontuan hartzeko” eskatu zuten, urriaren 5erako deituta dagoen hurrengo ohiko eta hileko hitzordua baino lehen egin litekeena.

Azken adierazpenean nabarmendu zutenez, “petrolioaren merkatuaren egungo oinarriak berrikusi eta haren perspektibei buruzko adostasuna egiaztatu ondoren” hartu zuten erabakia, etorkizuneko erabaki horiek zeintzuk izango diren zehaztu gabe.

Inolaz ere, orain arte egin izan duten bezala hurrengo bilera erregularra deitu beharrean, edozein unetan beste bilera bat egiteko aukera planteatzeak, nolabaiteko segurtasunik eza eta ziurgabetasuna erakusten du epe motzeko petrolio-merkatuaren bilakaerari dagokionez.

Energia tentsio handipean

Duela hilabete, Joe Biden Ameriketako Estatu Batuetako presidenteak bidaia historikoa egin zuen Saudi Arabiara, petrolioa merkatzeko eta inflazioa murrizteko helburuarekin LPEEk txorrotak ireki zitzan eska-tzeko; orduko akordioa hauste hori, energia merkatuetan oso tentsio handiko unean etorri da.

Egoera bereziki zaila bizi du Europak, Moskuk ostiralean erabaki bai-tzuen Nord-Stream 1 gas-hornidura denbora mugagabez etetea, eta Europar Batasunari (EB) petrolio eta produktu deribatuen salmenta guztiak mozteko mehatxua egin ziolako, baldin eta G-7ko potentziek muga ezartzen badiote petrolio errusiarraren prezioari.

Oharraren azken aipamenean LPEE+ erakundeak ez du garbi azaldu erabakiaren zergatia, baina itxura batean, ekonomiaren moteltzeak petrolio-eskariaren eta petroprezioen beherakada eragingo duen beldur dira.

Faktore horrek beheranzko presioa eragiten zion upelaren prezioari, eta %20tik gora galdua zuen jada, ekainean iritsi zen 120 dolarreko gailurretik.

Halere, bazegoen itxaropenik, azkenean egin duten bezala, LPEE+ek ponpaketa murrizteko, eta horrek irauli egin du joera hori.

Azaroan entregatzeko Brent petrolio upelaren prezioa %4,14 igo da Londresko etorkizunekoen merkatuan. Moteltze globalaren beldurrak eta petrolioaren eskaria geldiarazteak merkatuaren dinamika aldatu dute azken asteotan, Brent upela erortzen hasi eta upeleko 90 dolarreko mugara hurbildu delarik, Ukrainako gerra hasi zenetik inoiz galdu ez duen maila.

Esanda bezala, LPEE+ek bere erabakiaren arrazoiak zehaztu ez dituen arren, merkatuak aspalditik espero zuen Riadek neurriak hartuko zituela, prezioen jaitsiera handiagoa saihesteko.