Foru Aldundiko Gobernu Kontseiluak astearte honetan onartu du berdintasunaren aldeko Gipuzkoako emakumeen elkarteentzako dirulaguntzen deialdi berria, datorren urterako aurrekontua 510.000 eurora igoz, aurreko urtean baino 50.000 euro gehiago, hau da, %11 gehiago.
Foru Aldundiko bozeramaile Irune Berasaluzek prentsaurrekoan nabarmendu duenez, deialdi honen bidez, Aldundiak "berdintasunaren alde lan egiten duen komunitatea eta bere elkarte sarea indartzen jarraitu nahi du, matxismoaren aurka eta gure lurraldean berdintasunaren alde egiten duen lan garrantzitsua babestuz, arlo guztietan gizarte bidezkoago eta berdintasunezkoago baterako urrats gehiago emanez".
Berasaluzek laguntza lerro honek azken urteetan izan duen eragin hazkorra baloratu du eta iaz 45 proiektuk jaso zutela laguntza gogorarazi du, aurreko urtean baino hiru gehiago.
"Datu horiek erakusten dute Aldundiak gure laguntzak egokitu nahi dituela lurraldearen benetako beharretara eta elkarteek berdintasunean duten inplikazio gero eta handiagora", adierazi du bozeramaileak, eta berretsi du helburua dela "gero eta erakunde gehiagok bultzatzea beren ekimenak eta laguntzea Gipuzkoako emakumeentzako espazio seguruak eta ahalduntzekoak finkatzen, batez ere egoera ahulean daudenentzat".
Bi laguntza-lerro
Deialdi berriak dirulaguntzen bi ildo espezifiko jasotzen ditu: lehenengoa, elkarteen ohiko jarduerak finantzatzera bideratua, eta bigarrena, gizarteari oro har edo kalteberatasun handieneko egoeran dauden emakumeen kolektiboei zuzendutako proiektu espezifikoetan bideratua.
2026ko deialdiari begira, elkarteen ohiko jarduera finantzatzeko zuzkidura ekonomikoa indartu da, eta 120.000 euroko aurrekontua izango du.
