Iñaki Urdangarin astearte honetan bertan erabat libre izango da ondorio guztietarako, Noos auzian parte hartzeagatik ezarritako bost urte eta hamar hilabeteko zigorra beteko baitu. Hala ere, Cristina infantaren senar ohiak ez ditu bere aurrekari penalak ezabatuta izango beste bost urte barrura arte, baldin eta berriro deliturik egiten ez badu, noski. Palmako Auzitegiak sei urte eta hiru hilabeteko kartzela-zigorra ezarri zion Urdangarini, hainbat ustelkeria delitu egotzita, baina Auzitegi Gorenak bost hilabete murriztu zion zigorra, dokumentu publikoa faltsutzeagatik absolbitu egin baitzuen.
Behin zigorra iraungitzen zaionean, bere gizarteratzea erabat osatzeko, ondorio administratiboetarako delitu-iragana ezabatzea baino ez zaio geratuko eskubaloi jokalari ohiari. Izan ere, aurrekari penalak ez baitira Justizia Ministerioaren begietara desagertzen, bestelako deliturik egin gabe denbora epe bat igaro arte.
Palmako duke ohiaren kasuan, ezarritako kondena kontuan izanda, bost urte pasa beharko dira, eta epe horretan ezingo ditu lan jakin batzuk eskuratu, ezin izango du epaimahai bateko kide izan, boluntariotzako ekintza batzuk egin edo arriskutsutzat jotako txakurrak bere arduran izan, besteak beste.
Bere zigorraren amaiera bizitza pertsonalean aro berri bat zabaldu berri duenean datorkio Urdangarini, bere ezkontzaren 25. urteurrenaren atarian, eta bi urte bereizita eman ostean urtarrilean iragarri zuelako Cristina Borboikoarekiko dibortzioa, Ainhoa Armentiarekin zuen harremanaren berri jakin zenean.
Bikote berriarekin Gasteizen bizi bada ere, eskubaloiko jokalari ohiak harremanean jarraitzen du infantarekin, euren lau seme-alaben jarduera dela eta. 2018ko ekainaren 18an, inoiz espetxera sartu den erregearen lehen senide zuzena bihurtu zen Urdangarin, hamabi urte luze iraun zituen prozesu judizialaren ondoren, Noos auzian izandako erantzukizunagatik hainbat zigor ezarri baitzizkioten, besteak beste dirua bidegabe erabiltzea, prebarikazioa, Administrazioari iruzur egitea, bi delitu fiskal eta influentzia-trafikoa.
Felipe VI.aren koinatu ohiak Brievako (Avila) emakumeen kartzela aukeratu zuen zigorra betetzeko. Garai hartan Genevan bizi zen, eta emakumezkoen modulutik isolatutako ziega batean sartu zuten zigorra kitatzeko. 2019ko irailean, leundu egin zioten espetxealdia Urdangarini, Pozuelo de Alarconen desgaitasuna duten pertsonei arreta ematen dien GKE batean boluntariotza lanak egiteko baimena jaso zuelako – astean bi egunetan, zortzi orduz –.
Zigorraren laurdena bete zuenean jaso zuen lau eguneko lehen espetxe-baimena, eta, halaxe, Arabako hiriburuan Eguberri jaietako egun batzuk familiarekin pasatzeko aukera izan zuen. Aurrerago, 2020ko ekainean, bigarren graduko sailkapena jaso zuen, urtean 36 egun espetxetik kanpo pasatzeko eskubidea zuelarik; inolaz ere, baimenak eta boluntariotza bertan behera geratu ziren pandemia garaian. Eta hurrengo urteko urtarrilaren hasieran, Alcalá de Henaresko (Madril) Gizarteratze Zentrora (CIS) eraman zuten Urdangarin, atxilotuta jarraitzen zuelarik delitu ekonomikoengatik zigortutakoentzako gizarteratze-programa burutzeko, hirugarren gradua lortzeko bide gisa, eta lortu ere egin zuen handik aste batzuetara.
Lana bilatzeko aukera zere bazuenez, martxoan berriro lekualdatu eta Zaballako (Araba) espetxera joan zen, eta jada erregimen irekian zegoenez, astelehenetik ostegunera bitartean lotara baino ez zuen joan beharrik izan. Abokatu-bulego batean lortu zuen lana, aholkulari gisa, eta bertan ezagutu zuen Armentia. Portaera ona erakutsi zuenez, kartzelan gauak pasa beharrik ez izatea ere lortu zuen, astero kontrol bat eginda. Bere espetxe-prozesuko azken langa 2022ko martxoan gainditu zuen, infantaren senar ohiak baldintzapeko askatasuna lortu baitzuen zigorraren bi heren bete zituenean.
