Gogora Memoriaren, Bizikidetzaren eta Giza Eskubideen Institutuko Zuzendaritza Kontseiluak onartu du 2026ko ekitaldirako aurrekontuaren aurreproiektua, 5,2 milioi eurokoa.
Imanol Pradales lehendakaria buru izan da astearte honetan Bilbon egin den bileran, eta bertan izan dira Maria Jesus San Jose Justizia eta Giza Eskubideen sailburua eta Alberto Alonso Gogora Institutuko zuzendaria ere.
Alonsok ikerketa historikoetara bideratutako partida azpimarratu du aurreproiektuan, aurten baino %30 handiagoa dena eta 385.000 eurokoa, Gogora Institutuak ohar batean jakinarazi duenez.
Ikerketa horien eremuak dira, besteak beste, frankismopeko sexu- eta genero-aniztasuna, bai eta Euskadin Emakumea Babesteko Patronatua ere, emakumeei zuzendutako erakunde-sare errepresiboa, 1941ean sortua Estatu osoan, eta 1985era arte iraun zuena.
Kontseiluak, halaber, 2026rako Jarduera Plana onartu du, hainbat jarduera barne hartzen dituena, besteak beste, Bakearen Aldeko Koordinakundearen sorreraren 40. urteurreneko erakusketa, Lehen Eusko Jaurlaritza eratu zeneko 90. urteurrena eta martxoaren 3ko Gasteizko gertaeren 50. urteurrena.
Gerra Zibilean desagertuak
Gerra Zibilean Desagertutako Pertsonak Bilatzeko eta Identifikatzeko proiektuaren esparruan, baita pertsona horiek duintzeko jardueren esparruan ere, 100.000 eurotik 180.000 eurora igo da DNA bankuarentzat aurreikusitako partida.
Elgoibarko kolunbarioa handitzea eta Derioko hilerrian kolunbario berri bat eraikitzea ere onartu da.
2025eko azken hilabeteetarako, Gogora Institutuak Memoriaren Eguna azaroaren 10ean ospatzea eta abenduaren 1ean ikasle gazteen, biktimen eta espezialisten arteko beste topaketa bat egitea aipatu ditu jarduera nagusi gisa, Barakaldoko BECen. Oraingo honetan, Francisco Franco diktadorearen heriotzaren 50. urteurrenarekin batera, Gogorak diktaduraren azken urteak desmitifikatzeko jarduera bat proposatuko du.
