Zarautz | Udaz gozatzeko hamaika aukera

06.07.2021 | 01:13
Kalerki jaialdiaren baitan ospatutako ekitaldietako bat, Munoa plazan. Argazkia: Xabier Txurruka.

Zarautzek aurkeztutako bost kontzertuez gain, hainbat kirol eta kultura ekitaldi izango dira udaldi honetan

a ntzerki munduan murgilduta ibili da Zarautz azken egun hauetan Kalerki jaialdiarekin. Igandean eman zioten amaiera sei egunetako ekitaldiei eta "harrera bikaina" izan dute saioek antolatzaileen hitzetan. Munoa plazako ikuskizunetako sarrera guztiak agortu dira. Izatez jaialdi ibiltaria bada ere, osasun egoera dela eta moldatu egin behar izan dute formatua eta saio guztiak Munoan egin dituzte.

Hala joango da gainontzeko uda ere. Osasun neurriak baldintzapean izango dira jarduera guztiak. Bada, Zarauzko Udalak pasa den astean aurkeztutako bost kontzertuez haratago, ez da etenaldirik izango bi hilabete hauetan zehar herrian; kulturaren, kirolaren eta musikaren aldeko apustu irmoa egin dute aurten ere 2021eko udako egitarauean.

Bertso saioak emango diote hasiera udari ostiral eta larunbat honetan. Motxian bertso eskolak antolatuta, bertso musikatuak izango dira protagonista ostiraleko ekitaldian eta igandean, aldiz, Oier Aizpurua, Uxue Alkorta, Aner Euzki-tze, Nerea Isusi, Uxue Ostolaza eta Julen Zulaika bertsolarien txanda izango da. Villa Manuelako frontoian ospatuko dira bi ekitaldiak. Ostiraleko saioan, gainera, Basarri Bertso Paper sariaren sari banaketa egingo da, aurtengo edizioko irabazlea omentzeko.

Kirolak ere berebiziko garrantzia izango du Zarautzen udaldi honetan. Herri-kirol zaleentzat, abuztuaren 1ean Bi harri txapelketa jokatuko da. Hamar harrijasotzaile bi harri irregularrekin lanean arituko dira ahalik eta altxaldi gehien lortzeko. Abuztuaren 14 eta 15ean, berriz, Zarautz Kantauriko arraunaren hiriburu bilakatuko da. Sei estropada lehiatuko dira bi egun horietan. Larunbat goizean KAE-2 txapelketako Zarautz Arraun Elkartearen XII. Ikurriña eta ETE Ligako Zarauzko Arraun Elkartearen Emakumeen I. Ikurriña jarriko dira jokoan Zarauzko uretan. Ondoren Eusko Label Ligako eta Euskotren Ligako traineruak Zarauzko XLIV. eta XIII. Ikurriñak lehiatuko dituzte, hurrenez hurren, udako arraun hi-tzordurik garrantzitsuenetariko bat bilakatu den jardunaldi bikoitzean.

noticias de noticiasdegipuzkoa