Síguenos en redes sociales:

Trapujale Lezora iritsi da!

Ostegunetik hilaren 17ra arte luzatuko dira inauteriak herrian

Trapujale Lezora iritsi da!N.G.

Lezoko Udalak aurtengo inauterietako egitaraua aurkeztu du, eta ostegunetik aurrera 20 ekitaldi izango dira herrian. Otsailaren 13an hasi ziren ospakizunak eta otsailaren 17an, asteartebeltzean, amaituko dira. Aurtengo Larunbatgorriko herri-gaia kirolak izango da.

Arestian aipatu bezala, inauteriei Ostegunzurin eman zieten hasiera. Lehen hitzordua Lezo Herri Eskolan izan zen, Trapujale txikiari harrera eginez. Ondoren, 19.30ean, Trapujale Jaizkibel menditik jaitsi zen herrira.

Kalejiran, Trapujalek herriko kaleak zeharkatu zituen Tomas Garbizu Musika Eskolako taldeen eta Donostiako Alde Zaharreko joaldunen laguntzarekin, plazara iritsi arte. Bertan egin zuten aurtengo omenaldia: Xanti Valek jasoko zuen oroigarria, Trapujale Taldeak kultur teknikari gisa urte luzez egindako lana eta emandako babesa aitortzeko.

38 urteko ibilbidea

Aurkezpenean, Ainhoa Salaberriak, Kultur teknikariak, nabarmendu zuenez, “38 urte beteko ditu Trapujaleren inauteriak”. Jai Batzordeak 20 ekitaldi antolatu ditu, eta Larunbatgorriko ardatza herri-mailako gaia izango da: kirolak. Antolatzaileen asmoa da herritarren parte-hartzea sustatzea eta mozorroen sormena gai komun baten bueltan bideratzea.

Xanti Val lehen aldiz izan zen aurkezpenean gonbidatu gisa. Haren hitzetan, “mahaiaren beste aldean egotea arraroa da, baina hunkigarria”. Omenaldia ez du aitortza pertsonal gisa ulertzen, baizik eta “Lezoko kulturaren garai oso bati egindako aitortza” gisa. Inauterien osasunaz ere mintzatu zen: herri baten kulturaren neurgailuetako bat kaleetako parte-hartzea dela azpimarratu zuen, eta Lezon indar hori bizirik dagoela gaineratu zuen.

Xanti Val, oroigarria eskuetan duela.

Bere ibilbideari erreparatuta, ondorengo hausnarketa egin zuen: azken 30 urteetako saririk handiena ez dela jasoko duen oroigarria, baizik eta Udalera iritsi zen lehen egunean inauteriek zutenkolore eta indar berberamantentzen dutela ikustea.

Parte hartzeko deia

Jon Legorburu zinegotziak, Udalaren izenean, herritar guztiak gonbidatu zituen inauterietako ekitaldietan parte hartzera eta jai giroaz gozatzera. Egitaraua etxeetara banatu da dagoeneko, eta kontsultagai dago udalaren webgunean eta aplikazio ofizialean ere.

Lezok, beraz, inauterietarako prest ditu kaleak: tradizioa, sormena eta herriaren parte-hartzea izango dira berriz ere ardatz nagusiak.