Pasai Antxok Erraldoien Egunaren lehen edizioa ospatu du

Pasai Antxoko kaleek Erraldoien Eguna – Erraldoi eta Buruhandi Topaketa 2025 ekitaldiaren lehen edizioa ospatu zuten larunbatean eguerdi partean, San Tomas egunerako Jai Batzordeak prestatu zuen egitarauaren barruan. Eguraldi ezin hobeago batekin, erraldoi eta buruhandien tradizioa Antxoko kaleetara eraman zen. 12.30ean hasita, Hamarretxeta kaletik abiatu zen desfile ikusgarri bat, herritar zein bisitarien gozamenerako.

13.00etatik aurrera, Pasaiako konpartsa anfitrioiak gonbidatutako taldeak bildu ziren Gure Zumardian: Lezo, Irura, Agoitz eta Legazpiko konpartsak izan ziren bertan, bakoitza bere erraldoi eta buruhandiekin eta dultzainero taldeekin. Antolatzaileek nabarmendu zutenez ekimenak adin guztietako ikusleak erakarri zituen, batez ere umeak eta familiek tradizioz beteriko egun berezi batez gozatzeko aukera izan zutelako.

"Mugarri garrantzitsua"

Pasaiako konpartsako lehendakari Markel Oyarzabalek adierazi zuenez hitzorduak “2025 urteari amaiera bikaina” emango dio, etaeskertu egin zuen Antxoko Jai Batzordearen laguntza, ideiaren garapenean hasieratik bidelagun izan direlako. 

Oyarzabalek azaldu zuenez, konpartsaren arabera, topaketa “mugarri garrantzitsua” izango da, urte osoan Euskal Herriko hainbat herritan egindako emanaldien ondoren beren jarduna sendotzeko eta ikusgarritasuna handitzeko bidean.

Konpartsak bereziki eskertu zuen gonbidatutako taldeen parte-har-tzea, euskal erraldoien topaketek urteetan mantendu duten anaitasun tradizioa indartzen dutelako. Antxoko hitzorduak desfile bateratua, dantzak, koreografiak, musika eta babarrun jatea ekarri zituen, egun osoko jai giroa biziz.