Lasarte-Oriako Udalak herritar guztiak gonbidatu ditu frankismoaren basakeria pairatu zuten pertsonen oroimenez igandean, urriaren 26an, egingo den ekitaldian parte hartzera. Omenaldia 12.00etan hasiko da, Villa Mirentxun biktimen oroimenez eraikitako monolitoaren ondoan.
Ekitaldia Islada Ezkutatuak elkarteak gidatuko du. Talde honek sustatutako ekimenak memoria historikoa bizirik mantentzea eta biktimei eta haien senideei gorazarre egitea du helburu, egia, justizia eta erreparazioarekiko konpromiso kolektiboa berretsiz.
Aurreko urteetan bezala, udal ordezkariek eta hainbat kolektibo sozialek parte hartuko dute errepresio frankistaren ondorioak pairatu zituzten pertsona guztiei buruz hausnartzera, oroitzera eta errespetatzera gonbidatzen duen ekitaldian.
