Larunbatean Euskaraldiko Gune Ibiltaria Lasarte-Orian izango da
Mahaia Okendo plazan ipiniko da 18.00etan izena emateko eta materiala eskuratzeko
Euskaraldiak, eguneroko bizitzan euskararen erabilera sustatzen duen ekimenak, bere informazio postu ibiltaria,Gune ibiltaria, jarriko du Lasarte-Oriako Okendo plazan apirilaren 12an, larunbatean, 18.00etan. Gune horrek aukera emango die herritarrei Euskaraldiaren laugarren edizioan izena emateko, sustapen-materiala eskuratzeko eta 2025eko maiatzaren 15etik 25era egingo den ekitaldiari buruzko informazio zehatza eskuratzeko.
Ahobizi eta belarriprest
Gune ibiltaria Euskal Herriko hainbat herritan barrena dabil, Euskaraldian izena emateko eta parte-hartze rolak ezagutzeko aukera emanez: ahobizi eta belarriprest. Ahobizi rola aukeratzen duten parte-hartzaileek ulertzen duten pertsona guztiekin euskaraz hitz egiteko konpromisoa hartzen dute, elkarrizketak euskaraz hasi eta ahal den guztietan euskaraz mantenduz. Bestalde, belarriprest rola aukeratzen dutenek besteak euskaraz hitz egitera gonbidatzen dituzte, nahiz eta beraiek une bakoitzean erabaki zein hizkuntzatan erantzun.
Lasarte-Oriako Udaleko Euskara Zerbitzuak herritar guztiak animatzen ditu Euskaraldiaren edizio honetan parte hartzera eta, oraindik egin ez badute, modu errazean izena ematera, bai postu ibiltarian, bai Udalaren webgunearen bidez. Aurrez izena ematea garrantzitsua da, antolakuntza errazteko eta parte-hartzaile guztiek aukeratutako rolari dagokion bereizgarria jasoko dutela ziurtatzeko.
Hizkuntza ohiturak aldatu
Aurkezpenean, Euskara zinegotzi Estitxu Alkortak nabarmendu zuen ekintza honen helburu nagusia Lasarte-Oriako herritarren artean euskararen erabilera aktiboa sustatzea dela.
“Euskaraldia aukera bat da gure hizkuntza ohituren inguruan hausnartzeko eta euskararen erabileran aurrerapauso bat emateko. Gune ibiltaria bezalako ekimenekin proiektua kalera, plazara, hurbildu nahi dugu, eta herritar guztiak animatu nahi ditugu modu aktiboan parte hartzera”, adierazi zuen.
Horrez gain, publiko orori zuzendutako animazio jarduerak eskainiko dira, giroa dinamizatu eta parte hartzea bultzatzeko.