Auzolanean hiru landa-bide garbitzeko deia egin du Lazkaoko Udalak
Udalak Albitxutik Abalinerako bidea, Gurutz-Etxeberri baserritik Maiz-Berrirainoko bidea eta San Prudentziotik Izar-Basorako bidea txukun mantendu nahi ditu
Hiru landa-bide garrantzitsu garbitu eta mantentzeko deia egin du Lazkaoko Udalak. Horretarako, auzolan jardunaldiak antolatu ditu. Izan ere, bide horiek irisgarriak eta seguruak izango direla bermatzea ez ezik, auzokideen arteko lankidetza sustatzea ere du helburu.
Albitxutik Abalinerako eta San Prudentziotik Izar-Basorako bideak abenduaren 14an garbituko dira, eta Gurutz-Etxeberri baserritik Maiz-Berriraino bidea abenduaren 21ean. Hiru saioak 08.30ean hasiko dira.
Lana errazteko eta arintzeko, beharrezkoak diren eskuzko tresnez gain, traktore bat dutenek hura eramatea gomendatzen du Udalak.