Oiartzungo Kirol Saria Maialen Oiartzabal eskiatzaile akrobatikoari emango zaio

Urriaren 19tik 25era, Kirol Astea antolatu dute Oiartzungo Udalak eta herriko hainbat eragilek. Jardunaldi hauen helburuak oiartzuarrak aktibo mantentzea sustatu , kirolaren beste alde batzuk bistaratu eta modalitate ezberdinak jarri nahi dituzte erdigunean dira.

Aurtengo berrikuntzen artean, emakumeek gimnasioan indarra lantzeko hastapen tailerra egingo dute estreinakoz, maskulinizatutako espazioan genero horren ahalduntzea sustatzeko. 

Bestalde, ohi bezala, adin-tarte, egoera fisiko eta zaletasun guztietarako ekintzak antolatu dituzte aurten ere. Jarduera fisikoa eta kirola “guztiontzat” izateko. Horretarako, astearen aurkezpenean antolatzaileek azpimarratu zutenez, saiakera berezia egin dutela kirol praktiketatik edo zenbait modalitateetatik urrunago dauden herritarrengana iristeko.

Sedentarismoari aurre egiteko jarduerak ere prestatu dituzte. “Proposamen errazak dira, edozein adin eta egoera fisikoko pertsonei bizimodu aktiboagoa izateko lehen urratsak ematera animatzeko”, adierazi zuten. Izan ere, jarduera fisikoa eguneroko bizitzan modu progresiboan txertatzeko inoiz ez dela berandu erakutsi nahi dute.

Hezkuntzan eta sentsibilizazioan ere eragin nahi dute, eta solasaldia egingo dute astelehenean adin gabekoak babesteko inguru seguruak, inklusiboak eta errespetuzkoak sortzeko kirol elkarteek duten garrantziaz eta arduraz. Bereziki herriko kirol elkarteei zuzendutako saioa izango den arren, herritar guztientzat zabalik egongo dela adierazi dute.

Maialen Oiartzabal

Urtero bezala, Kirol Asteko azkeneko egunean, urriaren 25ean, Kirol Sariaren banaketa egiten da. 2024ko omendua Maialen Oiartzabal eskiatzaile akrobatikoa izango da. Bere ibilbide profesionala nabarmendu nahi izan du UKABek, herriko kirol elkarteetako ordezkariak eta Udala biltzen dituen Kirol Aholku Batzordeak. Aditzera eman zutenez, aitortza egingo diote, “Oiartzun herriaren izena munduan zehar zabaltzeagatik”.

Txikitatik datorkio Oiartzabali eskiarekiko zaletasuna eta 12-13 urterekin probatu zuen lehen aldiz freestyle-a. Ordutik, eskiatzera joatean eski modalitate hau landu eta entrenatu eta lehiaketa txikitan parte hartzen hasi zen, Slopestyle modalitatean gehien bat. Bizpahiru jauzi eta akrobazia ezberdinak egin behar dira lehiaketa hauetan, zirkuitu moduko batean.

Hainbat garaipen eta domina ditu bere palmaresean. Lau aldiz irabazi du Espainiako txapelketa eta Europa mailanhirugarren postua eskuratu zuen 2020an Slopestyle modalitatean, denboraldi horretan Europako Liga nagusian hirugarren geratzea lortuz.

Egitaraua

Ekintza guztiak doakoak izango dira.

Urriak 19, larunbata:

Erritmo saioa Elorsoron, 9:15etik 13:15era Elorsoro Kiroldegian. Antolatzailea: Eskola Kirola.

Futbol egokitua, 9:00etatik 11:00etara Karla Lekuona futbol zelaian. Antolatzaileak: Mindara eta OKE.

Pala egokitua, 11:30etik 13:30era Madalensoron. Antolatzailea: Mindara.

Urriak 21, astelehena:

Emakumeentzako indarra lantzeko hastapen tailerra, 10:00etatik 11:00etara Elorsoroko gihartze gelan. Antolatzailea: Elorsoro kiroldegia.

LOPIVI. Kirol elkarteak: Adin txikikoen kirola egiteko ametsa amesgaizto ez bilakatzeko erronkaren aurrean. Hitzaldia Juan Aldaz, 19:00etan pleno aretoan. Antolatzailea: Oiartzungo Udala.

Urriak 22, asteartea:

Toka txapelketa 55 urtetik gorakoentzat, 11:30etik 13:30era Landetxeko Toka lekuan. Antolatzailea: Gazte Izanak.

Mekanika tailerra, 18:00etatik 20:00etara Udako igerilekuaren azpiko lokalean. Antolatzailea: OTXE.

Benetako izenak. Bidaiatzeko eredu berriak sortzen: Himalaya eta Karakorum, 19:00etatik 21:00etara Landetxe Kultur Aretoan. Antolatzailea: Oiartzungo Udala.

Urriak 23, asteazkena:

Gimnasia familian, 17:00etatik 18:00etara Elorsoro kiroldegian. Antolatzailea: Hiruki Biraka.    

Mendi buelta korrika: Artaso-Urzelaita-Azkorrin-Zorrola-Artaso (8km inguru), 17:00etatik 18:30era Artaso Elkartean. Antolatzaileak: Intxixu Trail eta Haurtzaro Atletismoa.

Emakumeentzako indarra lantzeko hastapen tailerra, 18:00etatik 19:00etara Elorsoroko gihartze gelan. Antolatzailea: Elorsoro kiroldegia.

‘Roca’ (ELA eta mendia), 19:00etatik 21:00etara Landetxe Kultur Aretoan. Antolatzailea: Girizia Mendi Taldea.

Urriak 24, osteguna:

Mugikortasuna lantzeko talde lana, 10:30etik 11:30era Txara parkean. Antolatzailea: Abittu.

Gimnasia familian, 17:00etatik 18:00etara Elizalde ikastetxean. Antolatzailea: Hiruki Biraka.    

‘Kirol-elikadura: goi-mailako kirolariak nola zaintzen dira?’ Zigor Iturrieta eta Oihana Kortazarren hitzaldia, 18:00etatik 20:00etara Laboren. Antolatzailea: Labore.

Urriak 25, ostirala:

Goma elastikoekin indarra lantzeko ikastaroa, 9:30etik 10:30era Elorsoro kiroldegian. Antolatzailea: Abittu.

Nordic Walking saioa, 11:00etatik 12:00etara Elorsoro kiroldegian. Antolatzailea: Abittu.

Oiartzungo kirol sariaren banaketa – Maialen Oiartzabal, 19:00etatik 21:00etara Landetxe Kultur Aretoan. Antolatzailea: Oiartzungo Udala.