Urnietak Sanmiel jaiak iraileko azken asteburuan ospatuko ditu, hilaren 27tik 30era. Aurten, irailaren 29an Juanma Zarranzek jasoko du omenaldia. Astelehen honetako aurkezpenean Ana Pozas Kultura zinegotziak argitu duenez, Bosko Anitz aisialdi taldeko Juanma Zarranz izango da omendua “urte luzez herriko kulturari eta gazteriari egin dion ekarpen guztiagatik”.
Aipatu duenez, betidanik oso lotura handia izan du herriarekin eta bertako gizarte ehunarekin. Urte askotan irakasle aritu da Salestar ikastetxean, ehundaka urnietar gazte bere eskuetatik igaro direlarik. Horretaz gain, aipatutako moduan, Bosko Anitz aisialdi taldeko begiralea eta zuzendaria izan da, eta baita txarangako partaide ere. Beraz, esan daiteke Urnietako aisialdi esparruko erreferente esanguratsuenetariko bat dela. Hau guztiagatik bere lana eskertuko da Sanmiel egunean.
Bestalde, irailaren 27an Habitantes de Innsmouth elkarteko kideek izango dute aurtengo txupinazoa botatzeko ardura. “Rol elkarte honek duela 30 urte hasi zuen bere ibilbidea eta urte hauetan guztietan lan bikaina egin du interpretazio modalitate hori sustatzeko”, esan du Pozasek.
Eta gaineratu du: “Udalerriko dinamika sozial eta kulturalean murgilduta dago, eta hainbat ekitalditan parte hartzen du. Urtero prestatzen dituzte rol, estrategia eta simulazioari buruzko jardunaldiak. Antzararen joko erraldoia ere antolatzen dute Gazte Festen barruan eta beste ekimen batzuetan laguntzen dute, mota guztietako ikusleei irekitako tailerrak eskainiz. Beraz, beraien ibilbidea eta egiten duten ekarpena balorean jarri nahi izan ditugu”.
Aurretiko ekintzak
Sanmiel jaietako lau egunetako egitaraua zabala eta oparoa izango da, baina aurretik ere zer gozatuaz egongo da.
Honela, irailaren 21ean, padel txapelketa solidarioa, bolo txapelketa eta Transfariana pelikularen emanaldia izango dira. Hurrengo egunean, Extremadurako jardunaldiak antolatu dira. Irailaren 24ean, mahai jolasak eta toka, eta 26n bingoa egongo dira Elkarteen Etxean eta hilaren 26an, ere, Mendi Film Festival Saroben eta tortilla lehiaketa Txosnagunean izango dira.
Padel txapelketari dagokionez, London School of Languages eta ABAY Etiopia GKEk antolatu dute. Izen-ematea https://www.abayetiopia.org/PADEL helbide elektronikoan egin behar da.
