Lazkaoko kaleetan, jolas parkeetan eta eraikinetan pintadak nabarmen ugaritu direla adierazi du Lazkaoko Udalak, eta kezkatuta agertu da. Izan ere, ondorioz, aurten asko handitu dira eragindako espazio publikoak eta pribatuak garbitzeko eta zaharberritzeko gastuak. Gastu metatua 15.000 eurotik gorakoa izan da.
“Bada garaia herritar guztiei eragiten dieten horrelako jokabide eta ekintzak alde batera uzteko. Nahitaezkoa da espazio publikoak zein pribatuak zaintzea eta errespetatzea, baita hiri-altzariak eta udal-ondarea ere. Baterako ahalegin hori funtsezkoa da herritarren bizikidetza hobetzeko eta gure hiria zaintzeko”, azaldu du Lazkaoko alkatea den Kepa Zubiarrainek. “Lazkaoko bizilagunei eta bisitariei dei egiten diegu ahalegin komun honetan bat egin dezaten, ekintza bandalikoak salatuz eta ingurunearekiko errespetua sustatuz, Lazkao elkarrekin hobetzen jarraitzeko”, gaineratu du.
