Tamaina handiko hondakinen bilketari buruzko kanpaina bat jarriko du martxan Lezoko Udalak, San Marko Mankomunitatearekin elkarlanean, herritarrak hondakin horien kudeaketa egokiaz informatu eta kontzientziatzeko helburuarekin.
Gaur egun, tamaina handiko hondakinak asteazken gauean (20.00etatik 22.00etara) edukiontzien ondoan utzi behar dira. San Marko Mankomunitateak ostegun goizetan egiten du bilketa.
Hala ere, horrelako hondakinak adierazitako lekuetatik eta dagokien egunetik kanpo botata ikusten dira maiz, bai eta tamaina handikotzat jotzen ez diren hondakinak ere, eragozpenak eta zikinkeria eragiten dituztenak. Adibidez, etxetresna elektriko eta elektronikoak ez dira edukiontzien ondoan utzi behar, beste tratamendu bat dutelako.
Egoera hobetzeko, batetik kartelak jarriko dira portaletan, herritarrek informazioa eskura izan dezaten, eta, bestetik, pertsona bat egongo da kalean, behar bezala identifikatuta joango dena, informazioa emateko eta herritarrei inkestak egiteko.
Datu hauekin testuinguruaren diagnostikoa lortuko da, zein neurri hartu behar diren jakiteko.
