ZUMAIA - Datorren abenduaren 10etik 30era bitartean, Zumaiako Gertu merkatari eta ostalaritza elkarteak antolatuta, saltokietako erakusleihoen arteko lehiaketak ekingo dio. Izan ere, Gabon garaia gerturatzen doan heinean establezimendu askok euren kalerako lehen irudi hori apaindu eta girotzeko “esfortzu berezi bat” egiten dutela onartu zuen Zumaiako Udalak eta lan hori “eskertzeko” antola-tzen dutela ekimen hau, besteak beste.
Bestalde, garai honetan egiten diren erosketak aurreikusiz, Gertuk horiek herriko saltokietan egitera bultzatu nahi ditu herritarrak, “merkatari eta ostalariei bultzada bat emateko”, adierazi zuten. Horretarako, erakusleihoen lehiaketa honetan herritarrek paper aktiboa izango dute, izan ere beraiek izango baitira bi onenak aukeratuko dituztenak bozken bitartez. Horretarako Oxford aretora edo Turismo Bulegora jo beharko dute eta bakoitzak, gehienez, bi bozka emateko aukera izango du. Horrez gain, parte hartzen duten herritar guztien artean Gertuk smartbox bat zozkatuko du (paradore batean gau bat+afaria+gosaria), beraz, guztiak animatu nahi izan dituzte ekimen honetan parte hartzera.
Lehiaketa honen irabazleak 200 euroko erosketa bonua eskuratuko duela aurreratu dute elkarteko kideek eta, aldiz, bigarren postuan geratzen denak 100 eurokoa. Saridunak zeintzuk diren hilaren 31ean ezagutuko da, biko lasterketaren sari banaketan bertan. - N.O.
