Hirugarrenean ere ezin Eibarrek. Hirugarren denboraldiz jarraian, lehen mailara igotzeko lehiatik kanpo geratu da talde armagina play-offeko lehen kanporaketan. 2021-22 denboraldian, eibartarrak lider iritsi ziren fase erregularreko azken jardunaldira, baina ordurako maila galdua zuen Alcorconen aurkako porrot harrigarriak hirugarren postura eraman zuen, play-offa jokatzera kondenatuz.
Gironaren aurkako partida
Artean Gaizka Garitano zen entrenatzailea, eta Gironaren aurka jokatu zuten lehen kanporaketan. Armaginek ongi bideratu zuten katalanen aurkako kanporaketa joaneko partidan Aketxek sartutako gol bikainari esker (0-1). Baina Ipuruan, itzulerako partidan, Eibar ez zen gauza izan Borja Garciak lehen minutuan sartutako gola gainditzeko; partida luzapenera joan zen eta, denbora gehigarria hasi bezain laster, gipuzkoarrak kanporatu zituen 0-2koa sartu zuen Stuanik. Azkenean Gironak lortu zuen lehen ailara igotzea Teneriferi nagusituta.
Aurreko denboraldian, Eibarrek bosgarren postutik ekin behar izan zion play-offari, garaipenik lortu gabeko bederatzi partidako bolada azken jardunaldian apurtu ondoren. Armaginek berdindu egin zuten Ipuruan Alavesen aurka (1-1) eta itzulerakoan galdu Mendizorrotzan (2-0); iaz Glorioso igo zen lehen mailara Levante kanporatuta.
Oviedori, gol bakar bat sartu gabe
Hirugarrena Denboraldi honetan, Joseba Etxeberriaren mutilek ezin izan diote Oviedori gol bakar bat sartu, 72 aldiz atea zulatuta fase erregularreko talde golegileena izan arren. Sei garaipen jarraian pilatu ondoren, azkena liga erregularreko azken jardunaldian Oviedori 4-3ko emaitza harrigarriarekin (horrela, hirugarren postuan amaitu zuten eta Oviedo, galdu arren, seigarren postuan sailkatu zen). Gipuzkoarrek berdinketa ona lortu zuten hutsean Carlos Tartiere zelaian, ia 30.000 ikusleren aurrean; beraz, luzapena berriro ere berdinduta amaituz gero, itzulerako partidan Eibar pasako zen aurrera.
Baina lepo bete zen Ipuruan asteazken gauean gertatutakoa (7.732 zaletu, horietatik 600 Asturiaskoak) ez zen inolaz ere armaginek amestutako izan. Play-offetako porrot berri horrek hausnarketa-aldi batean murgildu du Eibar, ondo aztertu beharko baitu denboraldi berriari nola ekin, berriro ere Lehen Mailara igotzen ahalegintzeko.
