Anari eta Triangulo de amor bizarro arituko dira Intxaurrondon

Anarik eta Triangulo de amor bizarrok bat egingo dute Donostiako Intxaurrondo Kultur Etxeko programazioarekin. Kantautore azkoitiarraren kontzertua martxoaren 16an izango da eta indie rock talde galiziarraren txanda apirilaren 20an, Donostia Kulturak atzo jakinarazi zuenez.

Intxaurrondoko kultur etxeak Anariren disko berriaren aurkezpen kontzertua hartuko du martxoaren 16an. Giza zarata kantariaren ibilbide luzeko zazpigarren lana da, euskal musikako ahots pertsonalenetako bat, eta bere ohiko bandarekin batera aurkeztuko du.

Kontzertuan Muare ere arituko da, Maddi Gerriko Fariñas eta Eli Beraza Sorarrain musikariek osatua. Duela zenbait urte Koban taldean elkartu ziren eta proiektua hasi zuten zerbait pertsonalagoa sortzen saiatuz. “Giro elektronikoan bildutako pop-folk melodikoa egiten dute, sintetizadoreekin, erritmo kaxekin, looperekin eta ahotsekin sortzeko eta bilatzeko prozesuan”, azaldu zuten Donostia Kulturatik.

Bigarren hitzordua

Triangulo de amor bizarro taldeak, bestalde, Sed lan berria aurkeztuko du zuzenean apirilaren 20an Donostiako aretoan. Galiziako taldeak berak honela deskribatzen du lan berri hau: “mundu eta lurreko disko bat, aurkako mundu desberdin eta teknifikatu batean pertsonaien emozio primitiboak jorratzen dituena”. “Arrakastaren, ospearen eta boterearen bilaketari buruzko diskoa da, gailurreko bakardadeari buruzkoa”, diote.

Höpper taldeak Hiri hutsak disko berria aurkeztuko du. Taldekideak Freenetic, Fairlight, Prim Lane, 2AM, Krell edo Sphionkop formazioetan aritu dira. Bertako kideek, besteak beste, Saxon, Social Distortion, Dio eta Ritchie Blackmore nazioarteko taldeak teloneatu dituzte eta Delorean eta Buenas noches Rose taldeekin batera aritu dir