Zinemagileen arteko elkarrizketa ekimenaren protagonista esanguratsuenak Isabel Coixet eta Sara Mesa idazleak, eta J.A. Bayona eta Belen Atienza ekoizleak izango dira . Aurreko urteetan “izugarrizko arrakasta” izan zuen egitasmoaren hirugarren edizioa urtarrilaren 9an hasiko da Donostian.
Hain zuzen ere, aurtengo ekitaldira etortzerik izan ez zuten gonbidatuetako bik, Belen Funesek eta Marçal Cebrián gidoilariak, -kataluniarrak Lapur baten alaba berarekin idatzi zuen eta bigarren film luzea prestatzen ari da-, elkarrekin egindako lanari buruz hitz egingo dute datorren maiatzaren 7an.
Zikloari hasiera emanez, Kataluniako Zinema eta Ikus-entzunezkoen Goi Eskolan elkartu eta Negu kolektiboa osatzen duten Ekain Albitek, Adrià Rocak, Nicolau Mallofrék eta Mikel Ibargurenek, taldean zuzentzeak zer suposatzen duen partekatuko dute entzuleekin.
Nahi duen orok joateko aukera izango duen ekitaldi hauekin jarraituz, otsailaren 13an, Victor Iriarte errealizadorea eta Elias Querejeta Zine Eskolako zuzendari Carlos Muguiro "zinemaz eta beste gai batzuez" arituko dira; eta hilabete bereko 27an, Elena Martínek, Laura Ferrések eta Javier Macipek, lehen film bat errodatzearen esperientzia izango dute hizpide.
Literatur egokitzapenak izango dituzte hizketagai martxoaren 7ko hitzorduan. Bertan, bere azken filmaren oinarri den Un amor eleberriaren egile Sara Mesarekin arituko da solasean Isabel Coixet.
Badira oraindik bi hitzordu data baieztatzeke: batetik, Isabel Herguera eta Pablo Berger zuzendarien arteko topaketa, "animazioaren egoeraz" hitz egiteko; eta, bestetik, J.A. Bayona eta Belén Atienza Elurraren gizartea filmaren ekoizlearen artekoa, Lo imposible filmaren egilearen azken lana Oscarretan Espainia ordezkatzeko aukeratua izan delarik.
Aurten, gainera, zikloaren "alderdi pedagogikoa" azpimarratu nahi izan dute Una semana izeneko ekimenarekin, programatzearen ofizioaren inguruko proiekzioak eta beste ekitaldi batzuk barne hartuko dituelarik. Bestalde, martxoaren 4tik 7ra bitartean, Rick Prelinger artxibozain, zinemagile, idazle eta hezitzaileak tailerra eskainiko du, artxiboko ikus-entzunezko materialen esku-hartzeari eta muntaketari buruz.
2024ko solasaldiak Santa Teresa komentuan egingo dira, Koldo Mitxelena Kulturunea berritze lanetan dagoelako.
