Donosti. Benito Lertxundiren "gogoeta askearen" berri ematea eta migrazio fenomenoen atzean dauden bizi-esperientziak plazaratzea. Helburu horiek taxuz gauzatzen saiatuko dira datorren urte honetan VI. Tene Mujika bekaren irabazleak, Pako Aristi idazlea eta Mikel Markez kantaria, batetik, eta Ainara Gorostizu kazetaria, bestetik.
Atzo eman zituzten ezagutzera izen eta gai horiek Debako Udalak eta Elkar argitaletxeak, Donostian egindako aurkezpen batean. Inguruko historia hurbilaz biografiak, kronikak, erreportajeak, saiakerak, elkarrizketak nahiz ikerketak bultzatzeko sortu zuten diru laguntza hori eta, aurten lehen aldiz, saria bikoiztea erabaki du epaimahaiak (Lorea Agirre, Alberto Barandiaran eta Elixabete Garmendia), aurkeztutako lanen kalitatea kontuan hartuta. Udalak ere, beraz, bikoiztu egin du bere sostengua: 6.000 euro jasoko ditu irabazle bakoitzak.
Beka horrekin saiatuko dira Aristi eta Markez Benito, plazer bat izan duk proposamena hezurmamitzen. Kantautore oriotarrarekin hainbat urtetan egindako otordu osteko solasetan oinarrituko da lan hori, gai askori buruzko haren testigantza eta gogoetak modu "bizi eta periodistiko" batean kontatuz, idazle urrestillarrak aurreratu zuenez. "Ez da elkarrizketa liburu klasiko bat izango eta ez dugu gaika zatituko. Eduki ditugun solasaldietan bezala, motiboak modu natural eta aske batean kontatuko ditugu", argitu zuen.
Azken urteotan, hilero-hilero, Lertxundirekin izandako elkarrizketa horien ondoren "50 bat ordu" grabatu ditu Aristi-Markez tandemak. Orain lan hori guztia liburu batean "destilatzen" saiatuko dira, bat etorri zirenez.
Aurrekoak baino ezezagunagoa izanagatik, Ainara Gorostizu kazetari ataundarrak ere badu ibilbidea euskal prentsan, Euskaldunon egunkarian aurrena, eta Berrian gero. Oraingo honetan "migrazio fenomenoen atzean" dauden bizipenei so egin nahi die, ikuspuntu humano batetik. Horregatik, Euskal Herriko "perfil ezberdineko hamar emigranteren" istorioak jasotzea du helburu, EtorkiZUnak proiektua tarteko. Autobus bidai batean okurritu zitzaion ideia hori, inguruan zituen bidaiariei buruz bere barnerako galderak egiten hasi zenean. "Zein errealitate bizi duten, beren ezinak, negarrak, pozak, arrazoiak, asmoak, istorioak, herriminik baduten..." Antzeko galderei erantzuten saiatuko da Gorostizu.
