Zarauzko Osasun Zentroan pediatra berria izendatu dela-eta gure haserrea adierazi nahi dugu adierazpen honen bidez. Izan ere, Jose Cruz Bastidaren heriotzaren ondoren, haren ordez jarri duten profesionalak ez du euskarazko gaitasunik.
Hori horrela, lehenengo eta behin gure doluminak adierazi nahi dizkiogu bere familiari eta eskertu nahi dugu urte hauetan guztietan egin duen lana.
Bidal ezazu zure gutuna!
Zure Irakurlearen Gutuna bidali nahiko bazenu, gehienez 30 lerrokoa izan beharko da eta sinatua egon. Igorlearen NANaren kopia erantsi beharko da, baita telefono zenbakia ere bai. NOTICIAS DE GIPUZKOA egunkariak argitaratzeko eskubidea gordetzen du, baita laburtzearena ere. Gutunak cartas@noticiasdegipuzkoa.eus helbidera bidali.
Egoera berriaren aurrean honako hausnarketa egiten dugu:
- Zarautzen, herritarren %73 euskalduna da, eta haurren %96. Ulertezina iruditzen zaigu Zarautz bezalako herri euskaldun batean familiek eta haurrek arreta ezin euskaraz jaso ahal izatea.
- Hizkuntzaren eta osasungintzaren kalitateak lotura zuzena dute: konfiantza, hurbiltasuna eta ulermena ezinbestekoak dira, eta hori guztia bermatzea funtsezkoa da kalitatezko zerbitzua emateko.
- Zarauztarrok euskaraz bizi nahi dugu eta euskaraz bizitzeko eskubidea dugu, baita osasun arloan ere.
- Gure herriko haurrei bermatu behar zaie euskaraz bizitzeko aukera, eta ezin dira bigarren mailako herritar bihurtu.
Horregatik, Zirika Euskara Elkarteko kideok egoera hau salatzen dugu eta dei egiten diegu herritar guztiei pediatra euskalduna eskatzera. Ez dezagun onartu gure hizkuntza eta gure eskubideak berriro bigarren mailara baztertzea.
Gure herrian, euskaraz bizi nahi dugulako. Gure haurrek euskaraz artatuak izateko eskubidea dutelako. Pediatra euskalduna orain.
