Udako Ikastaroek 40 urte

07.10.2021 | 01:05
EHUko eta erakundeetako arduradunak atzo Donostian egindako ekitaldian.

UPV-EHUK EKITALDI INSTITUZIONALA ANTOLATU DU, IKASTAROEK HERRITARREN PRESTAKUNTZARI EGINDAKO EKARPENA GORAIPATUZ

EHUren Udako Ikastaroak azken 40 urteotako gizarte-eraldaketa handien "oihartzun-kaxa" izan dira. Bertan "zorroztasun akademikotik" aztertu eta zabaldu dira hainbat eta hainbat gai, "eztabaida, eta ondo informatutako herritar kritikoak sortzen" lagunduz.

Eva Ferreira euskal unibertsitate publikoko errektoreak, 1982an lehenengo edizioa egin zenetik bete diren lau hamarkaden balantzea egin zuen atzo.

Ferreirak prentsaurrekoa eskaini zuen Miramar Jauregian, Itziar Alkorta ikastaroen zuzendariarekin eta Leire Fernandez Arte Ederretako fakultateko irakaslearekin. Azken hauxe da, hain zuzen ere, Hitzen eta Sinboloen artean. EHUren Udako Ikastaroen 40 urte liburuaren egile-kidea.

Iñigo Urkullu lehendakaria buru izan zuen ekitaldi instituzionalarekin eman zitzaion amaiera aurtengo edizioari, eta urtemuga ere ospatu nahi izan zuten, agintari eta arduradun akademikoak eta erakunde publiko eta pribatu laguntzaileak bertan zirela, Ikastaroen aurreko zuzendari izandako Ricardo Echepare, José Luis de la Cuesta eta Carmen Agoués ain-tzatesteaz gain.

Errektoreak adierazi zuenez, 80ko hamarkadaz geroztik bizitzaren arlo guztietan bizitako "eraldaketa sozial itzelen lekuko" izan dira ikastaroak, eta berauen formatuari esker, aldaketa horien inguruko "azterketa akademiko zorrotzak egiteko beharrari erantzuteko" aukera eskaini dutela azpimarratu zuen. Bere hitzetan, "programazio arin, malgu eta interes handieneko informazio guneei adi egoteari esker lortu dute helburu hori" eta, horren ondorioz, euskal gizarteari egin dioten "ekarpena, garrantzi handikoa izan delarik".

Ikastaroek "ateak parez pare zabaldu dizkiote eztabaidari eta ideien kontrasteari", eta, bere ustez, horrek "balio erantsi handia eman dio burututako jarduerari". Bestalde, Alkortak aipatu zuenez, 1982an bederatzi ikastarorekin hasi omen ziren, azken urteetan 200 inguru eskainiz; udako euskal unibertsitateak 3.627 jarduera antolatu ditu, ia 288.000 pertsonak parte hartu dutelarik: 256.000 ikasle inguruk, 27.400 irakaslek, eta 4.800tik gora ikastaro-zuzendarik.

anteriorsiguiente
noticias de noticiasdegipuzkoa