1.064 irakasle kontratatu dira sare publikoan


25.11.2020 | 00:49
Ikasle batzuk eskolara sartzen. Argazkia: Alex Larretxi

donostia – COVID-19aren aurkako prebentzio-protokoloetan eskatutako neurriak aplikatzearen ondoriozko gastuak finantzatzeko, Eusko Jaurlaritzako Hezkuntza Sailak 105,2 milioi euro bideratu ditu. Horietatik, %65,12 (68,7 milioi) sare publikora joango dira, eta %34,88 (36,7 milioi) itunpeko sarera.

Hala adierazi zuen atzo Jokin Bildarratz Hezkuntza sailburuak Gobernu Kontseiluaren osteko prentsaurrekoan; bertan onartu zuten 36,7 milioi euroko aurrekontu-saila, itunpeko ikastetxeek protokolo horiek aplikatzeko gastuak finantzatu ahal izateko.

Bildarratzek azaldu zuenez, orain arte 1.064 irakasle kontratatu dira sare publikoan, eta beste 1.157 kontratu egin dira jangela- eta garbiketa-zerbitzuetarako; horrekin batera, beste material mota batzuk ere erosi behar izan dira, garbiketarako gelak adibidez, eta horrek 68,7 milioi euroko gastua eragin du.

Atzoko Gobernu Kontseiluan adostu zen 36,7 milioi euro bideratuko zirela itunpeko sareak ere behar horiei erantzun ahal izateko, beti ere ikasgeletako segurtasuna eta hezkuntzaren presentzialtasuna bermatzeko helburuarekin; Eusko Jaurlaritzak helburu hori ezarri baitu ikasturte "ezohiko" eta "oso zail" honetarako, Bildarratzek azpimarratu zuenez.

Sailburuak azaldu zuenez, laguntza horiek jaso ahal izango dituzte 2020-2021 ikasturtean Euskadin irakaskuntza arautu hauetakoren bat itunduta duten ikastetxeek: Haur Hezkuntza, Lehen Hezkuntza, DBH, Batxilergoa eta Lanbide Heziketa.

Ohiz kanpoko dirulaguntza horiek, langile berriak kontratatzeko edota daudenei orduak gehitzeko, irakasleak ordezkatzeko, garbiketa-gastuak ordaintzeko eta material informatikoa erosteko edo alokatzeko emango dira.

Irakasle eta irakasle ez diren langile berriak kontratatzeko zenbatekoa zehazteko, ikastetxe bakoitzeko ikasgelen eta ikasleen kopurua hartu da kontuan, bai eta haietako bakoitzaren "hezkuntza-konplexutasunaren indizea" ere, hainbat adierazletatik abiatuta egiten dena: ikaskuntzaren emaitzak eta hezkuntza-laguntzaren beharrak, egokitasuna, jatorria, ikastetxeko jarraitutasuna eta ikasleen maila sozioekonomikoa.

Material informatikoa erosi edo alokatzerako orduan, eskolatutako ikasle bakoitzeko zenbateko bat finkatu da ikastetxe bakoitzean.

Gainera, %20ko eta %40ko igoerak ezarri dira, hurrenez hurren, hezkuntza-itunean emandako moduluetan garbiketari eta irakasleen ordezkapenei dagokionean.

noticias de noticiasdegipuzkoa