Baserritarrek "ingurumenaren zaindari" gisa egindako lana eta Gipuzkoako historian lehen sektoreak izan duen paperaren aintzatespena izango dira Gure Lurra kongresuaren zortzigarren edizioaren ardatzak.
'Gure sustraiak: atzo, gaur eta bihar' lelopean, Gipuzkoako Foru Aldundiak antolatutako ekitaldia azaroaren 27an izango da, Kursaal Kongresu Jauregian, eta 1025ean 'Ipuscua' hitz idatziaren lehen agerpenaren 1.000 urteak ospatzeko ere balioko du, foru erakundeak ostiral honetan agiri batean jakinarazi duenez.
Irekiera
Eider Mendoza diputatu nagusiak irekiko ditu ateak, eta, ondoren, Elsa Punsetek hitz egingo du, besteak beste. Hark zubiak egingo ditu, alde batetik, adimen emozionalaren –aldaketa positiborako eta herritarren ongizate integralerako tresna gisa– eta, bestetik, naturarekiko harremanaren artean.
Lehen blokea
Jardunaldiaren lehen blokean Gipuzkoak paisaian izan duen historia eta bilakaera, itsasoaren papera eta euskararen transmisioa aztertuko dira, baita kontsumo ohituretan, kulturan eta nortasun balioetan izandako aldaketak ere, komunikatuak dioenez.
Atal honetan parte hartuko dute Eugenio Ibarzabal ekonomialari eta kazetariak, Iñaki Perurena harri-jasotzaileak, Izeta eta Zapiain sagardogileek, Xabier Alberdi Euskal Itsas Museoko zuzendariak, Luis Mari Zaldua Gipuzkoako Parke Naturalen Sareko zuzendariak eta Leire Arandia D 'Elikatuz zentroko arduradunak.
Bigarren blokea
Bigarren blokea, Elsa Punsetek irekiko duena, etorkizunari buruzkoa izango da, eta lehen sektorean belaunaldien arteko erreleboa ordezkatzen duten gazteen ekarpenak jasoko ditu.
